Алматы қаласында «Адал азамат» құндылықтарын дәріптеу және «Заң мен Тәртіп» қағидаттарын ілгерілетуге бағытталған Public Talk өтті. Кездесу «Қаржылық, цифрлық және ақпараттық қауіпсіздік» тақырыбына арналды, деп хабарлайды aqshamnews.kz тілшісі.
Іс-шараның негізгі мақсаты – қоғамның қауіпсіздік мәселелері бойынша ақпараттану деңгейін арттыру, азаматтардың қаржылық және цифрлық сауаттылығын жетілдіру, сондай-ақ жастар арасында жауапкершілік пен қауіпсіз мінез-құлық мәдениетін қалыптастыру.
Public Talk жұмысына бейінді ұйымдардың өкілдері, сала мамандары, білім беру ұйымдарының қызметкерлері және жастар қатысты.
Кездесу барысында Алматы қаласы бойынша Экономикалық тергеп-тексеру департаментінің ресми өкілі Жақсылық Мырзахан «Қаржылық сауаттылық – қауіпсіз және адал қоғам кепілі» тақырыбында баяндама жасады. Спикер қаржылық сауаттылықтың азаматтардың экономикалық қауіпсіздігін қамтамасыз етудегі рөліне тоқталып, жеке қаражатты тиімді басқару, қаржылық шешімдер қабылдау кезінде жауапкершілік таныту және ықтимал алаяқтық тәуекелдерінің алдын алу мәселелерін атап өтті.
Сонымен қатар Алматы көпсалалы колледжінің психологы Гүлзат Өміртаевна Анарбаева «Буллингтің алдын алу: оған бой алдырмау жолдары мен психологиялық тұрақтылық» тақырыбында сөз сөйледі. Баяндама барысында буллингтің алдын алу тетіктері, психологиялық тұрақтылықты қалыптастыру және күрделі жағдайларда дұрыс әрекет ету жолдары талқыланды.
Іс-шара аясында қатысушылар қаржылық, цифрлық және ақпараттық қауіпсіздікке қатысты өзекті мәселелер бойынша пікір алмасып, сарапшыларға сұрақтарын қойды. Ашық форматтағы диалог барысында күнделікті өмірде кездесетін қауіп-қатерлердің алдын алу, ақпаратты сыни тұрғыдан бағалау және қауіпсіздік талаптарын сақтау мәселелеріне ерекше назар аударылды.
Мұндай кездесулер азаматтардың құқықтық және қаржылық сауаттылығын арттыруға, қауіпсіздік мәдениетін қалыптастыруға және қоғамдағы жауапкершілік пен өзара құрмет қағидаттарын нығайтуға бағытталған.
Public Talk форматы сарапшылар мен қоғам өкілдері арасында ашық пікір алмасуға мүмкіндік беріп, өзекті мәселелер бойынша практикалық ақпарат пен түсіндіру жұмыстарын жүргізудің тиімді алаңына айналуда.