Әлеуметтік желіде қант диабетімен ауыратындарды дәрі-дәрмекпен қамтамасыз етуге қатысты неше түрлі қауесет тарап жатыр. Алматының бас штаттан тыс эндокринологы Светлана Большакова осы жағдайға байланысты түсініктеме беріп, тұрғындарды сабыр сақтауға шақырды.
Оның айтуынша, қант диабетімен ауыратын науқастарға арналған дәрі-дәрмектер қаланың барлық медициналық ұйымдарында жеткілікті екен. Дәрі-дәрмекпен, оның ішінде инсулинмен қамтамасыз етуде ешқандай іркіліс болмапты.
Сонымен қатар, алғаш рет қант диабеті диагнозы қойылған пациенттер үшін қаладағы медициналық ұйымдар қосымша өтінім қалыптастырып, оларды Бірыңғай дистрибьютор — «СК-Фармация» ЖШС-не жолдағаны атап өтілді.
Бұдан бөлек, 2025 жылғы 20 қарашада әлеуметтік маңызы бар аурулар, соның ішінде қант диабеті бойынша дәрі-дәрмекпен үздіксіз қамтамасыз ету мақсатында қосымша өтініштер жиналды. Қазірдің өзінде Алматының медициналық ұйымдарын осы дәрі-дәрмекпен толық қамтып жатыр, жеткізіп беру жұмысын биылғы 26 желтоқсанға дейін аяқтамақшы.
Дәрі-дәрмек алу барысында сұрақ туып, әлдебір қиындықтар болып жатса науқастар ең алдымен өздерінің медициналық ұйымына — пациенттерді қолдау қызметіне жүгінуі керек. Олардың мекенжайы мен байланыс нөмірі Алматы қаласы Қоғамдық денсаулық сақтау басқармасының ресми сайтында жазылған.
Егер мәселе онда да шешілмей жатса, Алматы қаласы Қоғамдық денсаулық сақтау басқармасына 1312 қысқа нөмірі арқылы тікелей хабарласа аласыз.