Алматы қаласының әкімі Дархан Сатыбалды кешкі уақытта шаһардың негізгі көшелері мен нысандарын аралап, сыртқы және сәулеттік жарықтандыруды жаңғырту жобаларының жүзеге асырылу барысын көріп қайтты. Сапар кезінде ол ШААЖ бойындағы көше шамдарының желісін және Абылай хан даңғылы №2 бойындағы ғимараттың қасбетін тексерді.
Әкім мұндай жобаларды жүзеге асырғанда техникалық талаптарды ғана емес, қаланың келбетіне көрік беретін сәндік шешімдерді де назардан тыс қалдырмау керектігін айтты.
«Бізге жай ғана сұрғылт мырышталған бағандар жеткіліксіз. Қаланың өзіндік сәулеттік қолтаңбасын айшықтайтын, көз тартарлық тіректер керек», — деді Дархан Сатыбалды.
Шаһар басшысының айтуынша, Алматыда жаңашыл идеялар мен тың жобалық шешімдер аз емес. Дегенмен олардың ойдағыдай жүзеге асуы үшін сапаға баса мән беріліп, жұмыс кестесі қатаң сақталуға тиіс. Осы мақсатта жобалардың орындалуы мен нәтижесі қатаң бақылауда болады.
Энергетика және сумен жабдықтау басқармасының мәліметінше, ШААЖ бойындағы ескірген 224 шам заманауи, қуаты 200 Ватт болатын жаңа шамдарға ауыстырылды. Олар жарық күшін реттеу және қашықтан басқару функцияларымен жабдықталған. Бұл электр қуатын үнемдеп, техникалық жағдайды жылдам қадағалауға мүмкіндік береді.
Айта кетейік, бүгінде қаланың жарықтандырылу деңгейі 88 пайызға жетіп отыр. Жыл соңына дейін бұл көрсеткіш толық 100 пайызға жеткізілмек.
Көше шамдарынан бөлек, қаланың әр ауданында сәулеттік жарықтандыру жобалары да қолға алынған. Мектептердің, әлеуметтік және спорттық нысандардың қасбеті, сондай-ақ негізгі көшелер бойындағы ғимараттар сәндік жарықпен көмкерілмек.