Алматы қаласының әкімі Дархан Сатыбалды Урбанистика орталығының ұжымымен абаттандыруға және жайлы қалалық кеңістіктер құруға жүйелі тәсілдерді әзірлеу және енгізу мәселелері бойынша кеңес өткізді. Урбанистика орталығы ағымдағы жылдың шілде айында Алматы Даму орталығының базасында сәулет, ландшафтық дизайн және көгалдандыру саласындағы сарапшыларды біріктіре отырып құрылған болатын.
Кеңес барысында Урбанистика орталығының өкілдері қалалық ортаны жаңғыртуға қатысты жүргізіліп жатқан жұмыстар мен негізгі жобалар туралы айтып берді.
Орталықтың негізгі міндеттері-қаланың сыртқы келбетін жақсарту үшін бірыңғай стильді қалыптастыру, жайлы қоғамдық кеңістіктерді абаттандыру бойынша жобаларды әзірлеу және көгалдандыруға озық тәсілдерді енгізу.
Бүгінгі таңда Урбанистика орталығы жасыл желектерді күтіп ұстау мен қорғаудың қолданыстағы ережелерін күшейтуге арналған көгалдандыру Жарғысын әзірлеуде. Құжат отырғызатын материалдарды стандарттауды, оның ассортиментін және күтіп-баптау сапасын, ағаш биіктігіне, тамырдың диаметріне және күтім стандарттарына қойылатын талаптарды арттыруды көздейді.
Бұдан өзге, көшелер мен рекреациялық аймақтарды жобалау жөніндегі нұсқаулықты, сондай-ақ материалдардың сапасына қойылатын бірыңғай талаптарды қамтитын абаттандыру қағидаларының жинағын құру бойынша жұмыс жүргізілуде.
Қала басшысы Дархан Сатыбалды жобаларды іске асырудың барлық кезеңдерінде жүйелі тәсіл мен сапаны бақылау басымдық болып табылатынын атап өтті.
«Басқармалар мен аудан әкімдіктері жобаларды іске асыру кезінде баттандыру мен көгалдандырудың бірыңғай ережелерін қатаң сақтауы тиіс. Урбанистика орталығы авторлық мониторинг функцияларын орындайды және Қоғамдық кеңістіктерді дамыту басқармасымен бірлесіп абаттандыру тұжырымдамаларын әзірлеуге қатысады», - деді Дархан Сатыбалды.