Алматы өзінің туған күнін ерекше түрде атап өтті: түрлі іс-шаралар мен мерекелік көңіл-күйден бөлек, қала – жаңа тұрғындармен толығып, үлкен сыйлыққа ие болды.
21 қыркүйекте Алматының перзентханаларында 69 сәби дүниеге келді, оның 32-сі ұл бала және 37-сі қыз бара.
Ондаған отбасылардың шаңырағында бұл күн ерекше маңызға ие болып, екі дүркін мерекемен аталып өтті: біріншісі – сүйікті қаланың туған күні, екіншісі –балаларының өмірге келуі.
«Енді бұл мереке біздің отбасымыз үшін – ең маңызды дата болмақ. Қызымыздың туған күнін алматылықтардың барлығымен бірге атап өтетін боламыз», - дейді жас ана.
Қаланың қоғамдық денсаулық сақтау басқармасы өмірге келген барлық сәбилер мен олардың аналары қазір өздерін жақсы сезініп отырғанын хабарлады.
Қала күні қарсаңында Қалалық перинаталдық орталықта сирек кездесетін және қуанышты оқиға орын алды –дүниеге үшем келді.
Салмағы 1968 грамм және бойы 42 см ұл, салмағы 1648 грамм және бойы 40 см қыз, салмағы 1699 грамм және бойы 41 см болатын тағы бір қыз өмірге келді. Отбасы «Аңсаған сәби» ЭКҰ мемлекеттік қолдау бағдарламасына жүгінген.
Медициналық көрсеткіштер бойынша босану 32-ші аптада шұғыл түрде жүргізілді. Сәбилердің анасы 30 жаста.
Ота ерте таңда, сағат төртте болғанына қарамастан, перинаталдық орталықтың білікті мамандар тобы жедел жұмылдырылды. Дәрігерлердің үйлесімді жұмысының арқасында кесір тілігі сәтті өтті. Сәбилер бірден жаңа туған нәрестелердің жансақтау бөлімінде көмек алды, содан кейін патология бөліміне ауыстырылды.
Қала күніне 69 сәби мен мерекенің қарсы алдында үшемнің дүниеге келуі –отбасылар үшін қуанышты оқиға ғана емес. Бұл Алматы – болашақтың қаласы екенін еске салады. Әрбір жаңа бала – жаңа үміт, ал балалардың барлығы бірге – бұл қала тарихын құратын және жалғастыратын болашақ ұрпақ.