Президент тапсырмасына сәйкес Алматы қаласына жасаған сапары аясында Мемлекет басшысының кеңесшісі Мәлік Отарбаев білім саласының өкілдерімен кездесті.
Іс-шара Оқушылардың инновациялық шығармашылық орталығында өтті, деп хабарлайды aqshamnews.kz.
Кездесуге Алматы қаласы Білім басқармасының қызметкерлері, мектепке дейінгі және мектеп ұйымдарының өкілдері қатысты. Олар Мемлекет басшысы Қасым-Жомарт Тоқаевтың Ұлттық құрылтайдың IV отырысында берген тапсырмалары аясында атқарылған жұмыстар мен алдағы жоспарлар туралы баяндады.
Атап айтқанда, педагогтердің кәсіби деңгейін арттыру мақсатында жүйелі жұмыстар жүргізілуде. Балаларды оқыту мен тәрбиелеудің жаңа формалары енгізілуде, ата-аналармен және қоғамдық құрылымдармен өзара байланыс нығайып келеді.
Білім басқармасының мәліметінше, мұғалімдерге арналған 19 семинар-практикум және түрлі тақырыпта 300-ден астам жиналыс ұйымдастырылған. Оқушыларды жан-жақты дамыту үшін тәрбие жұмысында заңға, мемлекеттік рәміздерге құрметпен қарау, отансүйгіштік пен экологиялық мәдениетке баулу бағытындағы іс-шаралар өткізіліп жатыр.
Сабақтан тыс уақытта оқушыларға әскери-патриоттық бағытта білім беру, ұлттық спорт түрлеріне баулу, «Жас Сарбаз», «Smart Bala» жобалары аясында мемлекеттік органдармен бірлескен жұмыстар жалғасуда. Сонымен қатар, қала мұғалімдері арасында шығармашылық бағыттағы түрлі байқаулар мен эстафеталар ұйымдастырылуда.
Білім саласының өкілдері Алматыда педагогтерге қолдау көрсету жұмыстарының күшейгенін атап өтті. Қала мектептерінде оқушылар толыққанды ыстық тамақпен қамтылып, мектеп автобустары тұрақты жұмыс істеуде.
Өз сөзінде Мәлік Отарбаев Мемлекет басшысының ұстаздар еңбегін әрқашан қолдайтынын және бұл бағыттағы саясат жалғасатынын айтты.
– Ұстаз – әрқашан қоғамдағы мәртебелі тұлға. Абай атамыз айтқандай: «Адамның адамшылығы – жақсы ұстаздан», – деді Мәлік Отарбаев.
Президент кеңесшісі педагогтердің қоғамдағы айрықша миссиясын атап өтіп, олардың еңбегі қазіргі және келер ұрпақ үшін аса маңызды екенін жеткізді. Ол ұстаздар еліміздің адами капиталының негізін қалыптастырып жатқанын ерекше атап өтті.
Сондай-ақ, спикер Президент айқындаған басым бағыттарға – қоғамды цифрландыру, көлік-коммуникация саласын, энергетика мен ауыл шаруашылығын дамыту қажеттігіне тоқталды.
– Бүгінгі таңда әділетті Қазақстанды қалыптастыру үшін жастарға сапалы білім беру, мемлекеттілікті, ел бірлігін және азаматтық ынтымақты сақтау – маңызды міндет, – деді Мәлік Отарбаев.
Кездесу соңында ол білім беру саласының қызметкерлеріне табыс пен шабыт тіледі.