Халықаралық әйелдер күні қарсаңында Төтенше жағдайлар департаментінде қызметкер әйелдерге ерекше мерекелік тосынсый жасалды, – деп хабарлайды aqshamnews.kz тілшісі.
Ғимараттың кіреберісінен бастап әйелдерді жаңа жауынгерлік киім киген өртсөндіруші-құтқарушылардан сап түзеп қарсы алды.
Жүрекжарды лебіздер аясында — «Сен ең кереметсің!», «Сен ең сұлу жансың!», «Мерекеңмен!» деген құттықтаулар айтылып, қызметкер әйелдер әріптестерінің құрметі мен алғысына бөлене отырып, сол дәлізбен жүріп өтті.
Мерекелік көңіл күй ғимарат ішінде де жалғасты: әйелдерді оркестр, арнайы безендірілген фотозона, тақырыптық баннер, сондай-ақ гүлдер мен әуе шарлары күтіп тұрды.
Жанды музыка, шынайы құттықтаулар және әріптестерінің ыстық ықыласы гарнизондағы қызметкер әйелдерге көтеріңкі көңіл күй сыйлап, көктем мерекесі қарсаңында жарқын да ұмытылмас әсер қалдырды.