Алматы қаласы мәслихатының ХХХIХ сессиясында депутаттар жергілікті бюджет есебінен қаржыландырылатын аурулар мен дәрілік препараттар тізімін кеңейту жөніндегі мәселені бірауыздан қолдады. Бұл шешім үш түрлі нозологияға шалдыққан алты пациентке қатысты.
Қаржыландырудың жалпы сомасы 128 млн теңгені құрайды. Қоғамдық денсаулық сақтау басқармасы ұсынған нозологиялар әлеуметтік маңызы жоғары, кей жағдайларда сирек әрі ауыр дерттердің санатына жатады.
Жергілікті бюджет есебінен амбулаториялық деңгейде дәрілік препараттар жүйелі қызыл жегі, қысқа ішек синдромы және оптикомиелоневрит (Девик ауруы) диагнозы бар пациенттерге жеткізіледі.
"Бұл патологиялармен ауыратын науқастар үшін заманауи препараттарды қолдану – жай ғана медициналық қажеттілік емес, ауруды тұрақтандырудың, еңбекке қабілеттілікті сақтаудың және мүгедектікке жол бермеудің жалғыз жолы. Ұсынылған әрбір мәселе – өңір тұрғындарының нақты қажеттілігіне негізделген. Әр санның артында қиын өмір жағдайына тап болған адамдар мен олардың отбасылары тұр", – деді Алматы қаласы Қоғамдық денсаулық сақтау басқармасы басшысының орынбасары Ләйла Иманғалиева.
Айта кетейік, Қазақстан Республикасының "Халық денсаулығы және денсаулық сақтау жүйесі туралы" Кодексіне сәйкес, 2017 жылдан бері орфан ауруларымен ауыратын пациенттер қымбат дәрілік препараттармен негізінен мәслихаттардың шешімі бойынша жергілікті бюджет есебінен қамтамасыз етіледі.