Алматыда 1 қыркүйектен бастап 1-сынып оқушыларына туберкулезге қарсы екпе егу науқаны жүргізілді, деп хабарлайды Almaty-akshamy.kz Inform.kz-ке сілтеме жасап.
Ведомствоның мәліметінше, балаларға манту егу науқанының қорытындысы бойынша 6182 баладан (22,7%) оң нәтиже анықталды.
«Оң нәтиже анықталған 6182 балаға рекомбинантты туберкулез аллергені (РТА) сынамасы жасалды. Нәтижесінде туберкулез микобактерияларын алғаш рет жұқтырған 39 бала анықталды. Оларға профилактикалық ем тағайындалды»,- делінеді хабарламада.
Ведомство мәліметінше, балаларда туберкулездің дамуының бірден бір себебі - туберкулезбен ауыратын науқаспен ұзақ қарым-қатынаста болу. Сол кезде баланың ағзасы микобактерияларды жұқтырады.
«Мегаполистің эпидемиологтары туберкулезді сәтті емдеудің бір шарты - ауруды ерте анықтау екенін еске салады. Ауруды ерте анықтау үшін туберкулезден сақтанып, аурудың белгілерін білу және дер кезінде дәрігерге қаралу қажет»,- деп ескертті қалалық санитариялық-эпидемиологиялық бақылау департаменті.
Сурет: Time.kz