Өңірлік коммуникациялар қызметі алаңында Қазақ онкология және радиология ғылыми-зерттеу институтының сарапшылары қатысқан брифинг өтті.
Алматы шетелдік пациенттерді тартатын, онкологиялық ауруларды кешенді емдейтін негізгі орталықтың біріне айналған, - деп хабарлайды Aqshamnews.kz.
Қазақ онкология және радиология ғылыми-зерттеу институтының химиотерапия бөлімшесінің меңгерушісі, қауымдастырылған профессор, медицина ғылымдарының кандидаты Қалдыгүл Смағұлованың айтуынша, Алматыға медициналық көмек алу үшін Қырғызстаннан, Өзбекстаннан, Әзербайжан мен Ресейден де келе бастаған. Шетелдіктер мұнда негізінен кешенді диагностикадан өтіп, жан-жақты ем алады екен.
«Қазақ онкология және радиология ғылыми-зерттеу институтының дерегіне тоқталсақ, 2025 жылы бізде шамамен 500-ге жуық шетелдік азамат диагностика мен ем қабылдаған. Бұл көрсеткіш жыл сайын өсіп келе жатыр», - дейді Қалдыгүл Смағұлова.
Ол пациенттердің сәулелік терапия, ісікке қарсы дәрілік терапия, сондай-ақ хирургиялық емнің жекелеген түрін алу үшін келетінін нақтылады. Мамандардың айтуынша, Алматыда онкологиялық көмектін толық циклы болғандықтан, осы заманғы медициналық технологиялардың көмегімен емдейтіндіктен сұраныс та артыпты.
Қазақ онкология және радиология ғылыми-зерттеу институты басқарма төрағасының орынбасары Айша Молдашева медициналық туризмнің дамуы замандық онкологиялық көмектің сапасы мен қолжетімділігіне тікелей байланысты екенін атап өтті. Онкологиялық аурулар туралы ең кең тараған мифтердің бірі - қатерлі ісікті үкім ретінде қабылдау екені айтады.
«Қазір қатерлі ісіктің барлық түрін емдейді, олар барған сайын басқарылатын созылмалы жағдайлар санатына өтіп жатыр. Қазіргі заманғы онкология - бұл жоғары технологиялық хирургиялық ем, дәл сәулелік терапия, сондай-ақ химиотерапия, соның ішінде иммундық-онкологиялық және нысаналы дәрілік терапия», - деді Айша Молдашева.
Сондай-ақ ол ерте диагностика мен скринингтік бағдарламалардың ем тиімділігін тікелей арттыратынын және халық үшін кепілдендірілген тегін медициналық көмек көлемі аясында қолжетімді екенін еске салды.