Пай, пай, Өмір…
Өтесің-ау бір күні,
Тыясың-ау қуанышты, күлкіні.
Өмір деген — бір жарқ еткен найзағай,
Өмір деген — көк аспанның күркірі…, - деп жырлаған мұзбалақ ақын Мұқағали Мақатаевтың 95 жылдық мерейтойы атап өтілді.
Айтулы мерейтой қарсаңында Қоғамдық даму орталығы алаңында «Бір өлеңі – бір елдің мұрасындай» атты әдеби-лирикалық кеш ұйымдастырылды.
Поэзия арқылы ұлт рухын асқақтатуды мақсат еткен тағылымды шараға Темірбек Жүргенов атындағы Қазақ ұлттық өнер академиясының студенттері қатысып, көркем композициялар ұсынды. Әр өлең, әр сөз көрермен жүрегіне жетіп, ақын рухына тағзым жасалды.
Іс-шара қонақтары:
Едіге Қожахмет — кітап продюсері, «Bilte qory» қамқоршылар кеңесінің төрағасы;
Әділет Ахметұлы — ақын, Ахмет Байтұрсынұлы музей-үйінің аға ғылыми қызметкері, түркітанушы;
Гүлманат Әуелхан — ақын, Халықаралық «Шабыт» фестивалінің дипломанты, «Жүз өлең» атты жыр жинақтарының авторы;
Шығармашылық кеш соңында Қоғамдық даму орталығының басшысы Ақылжанова Ләззат Төкенқызы қонақтар мен студенттерге ұлт мұрасын ұлықтауға қосқан үлестері үшін алғыс білдіріп, арнайы хаттар табыстады.