Алматы қаласының Білім басқармасына қарасты КМҚК «№84 бөбекжай-балабақшасында» «Мектепке дейінгі тәрбие мен оқыту ұйымдарындағы жобалық қызмет» тақырыбында республикалық ғылыми-әдістемелік конференция ұйымдастырылды, деп хабарлайды aqshamnews.kz
Конференцияның мақсаты – мектепке дейінгі білім беру саласында экологиялық тәрбие бойынша жобалық қызметтің озық тәжірибелерін көрсету, тәжірибе алмасу және педагогикалық қауымдастықта экологиялық тәрбие мәселелерін талқылау. Конференцияда инновациялық әдістер мен технологиялар ұсынылып, қатысушыларға теориялық және практикалық тұрғыда білім мен дағдылар беріледі.
Конференцияның маңызды сәттері:
- Жаңа жобаның презентациясы: Сингапур тәжірибесі негізінде қалдық заттарға екінші өмір сыйлау және экологиялық тәрбиені дамыту;
- Тәрбиеленушілер мен ұйымдастырылған іс-әрекеттерді көрсету;
- Шеберлік сыныптары;
- Балабақша ішінде балалардың еркін ойнайтын орталықтарын ұйымдастыру бойынша экскурсиялар;
- Жобалық қызметті ұйымдастыру бойынша пікір алмасу;
- Педагогтардың тәжірибе алмасуы.
Конференцияның қонақтары мен қатысушылары:
- Балаларды ерте дамыту институтының өкілдері;
- Қызылорда облысының білім басқармасының Қармақшы ауданы бойынша білім бөлімінің білім беруді дамыту секторының бас маманы – Алмаганбетова Хатира Арубаевна;
- Астана, Ұлытау облысы, Түркістан облысындағы мектепке дейінгі ұйымдарының басшылары мен тәрбиешілері, әдіскерлері және сала мамандары.
Конференцияның маңызды бөлімі ретінде Алматы қаласының «Балауса» балабақшасының меңгерушісі Жайсанбаева Акерке Сағынышқызы 2023 жылы Сингапур елінде тағылымдамадан өтіп, сол жерде алынған тәжірибені Қазақстандағы балабақша жұмысын жақсарту мақсатында қолданғанын атап өтті. Сингапурда көмекші құралдар мен әсем безендірулер қалдық материалдардан жасалады, бұл тәжірибені ол «Табиғат және біз» жобасында қолданды. Жоба экологиялық тәрбиеге бағытталған және қалдық заттарға екінші өмір сыйлау концепциясымен жүзеге асырылды.
Бұл шара мектепке дейінгі білім беру ұйымдары арасында жаңа идеялар мен тәсілдерді қолданысқа енгізуге мүмкіндік туғызды. Қатысушылар қалдық заттарды көмекші құрал ретінде пайдаланудың заманауи тәсілдерімен танысып, экологиялық жобалық қызметті дамыту үшін жаңа мүмкіндіктер туралы пікір алмасты.
Конференция мектепке дейінгі білім беру саласындағы инновацияларды насихаттап, педагогтарға жаңа білім мен дағдылар алуға көмектесті. Бұл шара балабақша педагогтары үшін пайдалы әрі мазмұнды болды, сондай-ақ экологиялық тәрбие мен жобалық қызметтің өзекті мәселелеріне назар аударды.