Алматыда «Open Healthcare Kazakhstan» ЖШС мен Алматы қаласы Туризм басқармасының бірлескен ұйымдастыруымен Қазақстан–Корея медициналық туризміне арналған семинар өтті, – деп хабарлайды aqshamnews.kz тілшісі.
Іс-шараға Қазақстан мен Корея Республикасының медициналық ұйымдарының өкілдері, туроператорлар және сала сарапшылары қатысты.
Семинар барысында қатысушылар Оңтүстік Кореяның заманауи медициналық технологиясы және қызметтерімен танысып, профилактикалық диагностика (check-up) мәселесін, сондай-ақ медициналық туризмді дамыту және халықаралық ынтымақтастықты кеңейту мүмкіндіктерін талқылады.
«Бүгінде Алматы Орталық Азиядағы үздік медициналық орталықтардың бірі ретіндегі орнын нығайтып келеді. Халықаралық ынтымақтастықты дамыту және шетелдік серіктестермен тәжірибе алмасу медициналық туризмді дамытуға әрі қаланың тартымдылығын арттыруға жаңа мүмкіндіктер ашады», – деді Алматы қаласы Туризм басқармасы басшысының орынбасары Ақмарал Ещанова.
Іс-шара аясында Алматы қаласы Туризм басқармасы мен «Open Healthcare Kazakhstan» ЖШС ынтымақтастық туралы меморандумға қол қойды. Құжат медициналық туризмді дамытуға, Алматының туристік және медициналық әлеуетін ілгерілетуге, сондай-ақ осы саладағы бірлескен бастамаларды жүзеге асыруға бағытталған.
Семинарда қазақстандықтардың Корея Республикасында медициналық қызмет алу мүмкіндіктері туралы хабардарлығын арттыруға, екі елдің салалық ұйымдары арасындағы серіктестік байланысты нығайтуға және өзара ынтымақтастықты дамытуға ерекше назар аударылды.
Іс-шара барысында жарияланған мәліметтерге сәйкес, Қазақстанда медициналық туризм саласы тұрақты өсім көрсетуде. Егер 2022 жылы елімізге шамамен 1,3 мың шетелдік пациент келген болса, 2024–2025 жылдары бұл көрсеткіш 80 мың адамға жуықтаған.
Осындай іс-шаралардың өткізілуі Қазақстан мен Оңтүстік Корея арасындағы ынтымақтастықты нығайтуға, медициналық туризмді дамытуға және Алматыны өңірлік медициналық қызмет көрсету орталығы ретінде танытуға ықпал етеді.