"Қауіпсіз жол" жедел-алдын алу шарасы аясында Түрксіб ауданының полиция қызметкерлері жүк көлігін мас күйінде басқарған жүргізушіні анықтап, ұстады, - деп хабарлайды Aqshamnews.kz.
Бұл туралы қалалық полиция департаментінің баспасөз қызметі хабарлады.
Медициналық куәландыру нәтижесінде жүргізушінің алкогольдік масаң күйде болғаны расталып, ол заң талаптарына сәйкес жауапкершілікке тартылды.
Сот шешімімен азамат 7 жыл мерзімге көлік құралын басқару құқығынан айырылып, 15 тәулікке әкімшілік қамауға алынды.
«Мас күйде көлік басқару — жол қозғалысы қауіпсіздігіне тікелей қауіп төндіретін заңбұзушылық. Мұндай әрекеттерге тосқауыл қою — біздің басты міндетіміз. Әрбір құқықбұзушы жазасыз қалмайды», — деді Түрксіб аудандық полиция басқармасының бастығы Думан Аухадиев.
Алматы қалалық полиция департаменті жүргізушілерді жол қозғалысы ережелерін қатаң сақтауға, сондай-ақ жолда қауіпсіздік мәдениетін қалыптастыруға шақырады.