Алматыда Мәдина Ералиеваны еске алуға арналған «Сағындырған әндер-ай» концерті өтеді, – деп хабарлайды aqshamnews.kz тілшісі.
2026 жылғы 17 сәуір күні сағат 19:00-де Алматы қаласындағы «Республика» сарайында қазақ эстрадасының көрнекті өкілі, Қазақстанның еңбек сіңірген әртісі Мәдина Ералиеваны еске алуға арналған «Сағындырған әндер-ай» атты концерттік кеш өтеді.
Бұл мәдени іс-шара ұлттық музыкалық мұраны сақтау және дамыту, сондай-ақ қазақ эстрада өнерінің дамуына өлшеусіз үлес қосқан өнер иесінің шығармашылығын ұлықтау мақсатында ұйымдастырылып отыр.
Концерттік бағдарлама аясында Мәдина Ералиеваның репертуарындағы кеңінен танымал әндер Қазақстанның белгілі эстрада және дәстүрлі өнер өкілдерінің орындауында ұсынылады.
Кешке Қазақстанның халық әртістері мен еңбек сіңірген қайраткерлері, танымал әншілер мен шығармашылық ұжымдар қатысады. Олардың қатарында Роза Рымбаева, Майра Ілиясова, Мәдина Сәдуақасова, Тамара Асар, Алишер Каримов, Жанар Айжанова, «Жігіттер» тобы, сондай-ақ «Адырна» және «Сазген сазы» ансамбльдері мен «Райанбо» балалар хоры бар.
Орындаушылардың дайындық және репетиция жұмыстары концерт өтетін күні сағат 10:00-де басталады.
«Сағындырған әндер-ай» концерті – көрерменге ерекше рухани әсер сыйлап, ұлттық өнердің сабақтастығын дәріптейтін тағылымды кеш болмақ.
Өтетін орны: «Республика» сарайы
Күні: 2026 жылғы 17 сәуір
Басталу уақыты: 19:00