Бүгін, 27 қаңтар 2025 жылы, Алматыдағы 28 гвардияшы-панфиловшылар саябағында Ленинградтың қоршаудан босағанына 81 жыл толуына орай еске алу митингі өтті, деп хабарлайды aqshamnews.kz.
1941 жылдың 8 қыркүйегінен 1944 жылдың 27 қаңтарына дейін 872 күнге созылған бұл блокада – Ұлы Отан соғысы тарихындағы ең ауыр гуманитарлық апаттардың бірі. Қоршау кезінде миллиондаған бейбіт тұрғын мен қаланың қорғаушылары қаза тапты. Бұл оқиға адамзаттың қайсарлығы мен рухының сыналуының символы ретінде тарихта мәңгі сақталады.
Шараға қаланың сегіз ауданының ардагерлер кеңестерінің өкілдері, Ресей Федерациясының Бас консулдығы, Ауған соғысының ардагерлері, қоғамдық ұйымдар мен партиялардың өкілдері қатысты. Олар Ленинградты қорғау жолында қаза тапқан бейбіт тұрғындар мен жауынгерлерді бір минут үнсіздікпен еске алды.
Алматыда «Ленинград блокадашыларының қалалық ұйымы» қоғамдық бірлестігі жұмыс істейді. Бұл ұйымға сол бір ауыр кезеңде Ленинградтан аман қалған бұрынғы тұрғындар мүшелік етеді. Ұйымның жетекшісі Марина Николаевна Сергиева – қоршау кезінде «Өмір жолы» арқылы Ладога көлінің үстімен Қазақстанға эвакуацияланғандардың бірі. Ол өзінің балалық шақтағы естеліктерімен бөлісті. Бомбалау, үрей және ұзақ жолдағы қиындықтарға қарамастан, анасының қайсарлығы арқасында Марина Николаевна отбасымен бірге аман қалған.
Бүгінде Марина Николаевна өзінің жасына қарамастан, қоғамдық-саяси белсенділігін жалғастырып, ел Президентінің саясатын қолдау, тұрақтылықты сақтау және жастарды патриоттық рухта тәрбиелеу бағытында жұмыстар атқаруда. Ол қоғамның бейбітшілігі мен бірлігіне ерекше мән береді және бұл құндылықтарды ұрпақтан ұрпаққа жеткізуді өз міндеті деп санайды.
Шара барысында 28 гвардияшы-панфиловшылар саябағында жиналғандар естелік гүл шоқтарын қойып, қоршау құрбандарын еске алды. Бұл күн – адамзат тарихындағы ең ауыр, бірақ батырлыққа толы оқиғалардың бірі ретінде жадымызда қалмақ.