Алматы қаласында күзет агенттігі ретінде тіркеліп, заңсыз әрекеттермен айналысқан қарулы ұйымдасқан қылмыстық топ (ҰҚТ) әшкереленді.
Қылмыстық топтың мүшелері кәсіпкерлерге қысым көрсетіп, нысандарын күшпен тартып алып отырған. Олар адамдарды ұрлап, бопсалап, физикалық және психологиялық зорлық-зомбылыққа да барған, деп хабарлайды aqshamnews.kz.
Ішкі істер министрлігінің хабарлауынша, бұл топ ойын-сауық орындарының иелері мен қызметкерлеріне күш қолдану арқылы кәсіпкерлік нысандарын иемденіп, кейін сол жерде «қауіпсіздік қызметін» атқарған сыңай танытқан.
Ұйымдасқан қылмыстық топты ҰҚТБ (Ұйымдасқан қылмысқа қарсы күрес басқармасы) қызметкерлері ҰҚК мен прокуратураның үйлестіруімен жойды. Арнайы операция нәтижесінде Алматы, Жетісу, Түркістан, Маңғыстау, Жамбыл және Алматы облыстарында топтың 20 мүшесі ұсталды.
Тергеу барысында 40-тан астам тінту жүргізіліп, 7 бірлік атыс қаруы – оның ішінде 3 кесілген аңшы мылтығы, Макаров тапаншасы, Калашников автоматы және 100-ден астам оқ-дәрі тәркіленді. Бұл туралы ІІМ ұйымдасқан қылмыспен күрес департаментінің өкілі Қуандық Алпыс мәлімдеді.
Қазіргі уақытта бұзақылық, бопсалау, адам ұрлау, өз бетімен әрекет ету және денсаулыққа зиян келтіру деректері бойынша қылмыстық істер тергеліп жатыр. Сонымен қатар, топ басшысы мен мүшелеріне қатысты ҰҚТ құру, оған жетекшілік ету және қатысу бойынша сотқа дейінгі тергеу амалдары жүргізілуде. Олар басқа да осыған ұқсас қылмыстарға қатысы бар-жоғы бойынша тексерілуде.
ІІМ мәлімдеуінше, бизнеске қысым көрсету және қылмыстық араласу әрекеттері мемлекет бақылауында. Заңға қайшы кез келген әрекет қатаң түрде тоқтатылады.