Алматыда көшелердегі көктайғақтың алдын алуға арналған жаңа жүк көліктері сатып алынды.
Алматыда бюджет қаражаты есебінен «Алматы Тазалық» МКК қарамағына көшедегі көктайғақтың алдын алу үшін КамАЗ 65116-6010-48 автомобиліне орнатылған сұйықтық шашатын аспалы жабдығы бар үш аралас жол машинасы сатып алынды.
Жаңа көліктер Алматының Алмалы, Бостандық, Медеу аудандарында көше тазалығымен айналысады. «Алматы Тазалық» МКК өкілдері жаңа техниканың көктайғақпен күресуде пайдасы көп екенін айтады.
- Бұл техниканың ерекшелігі – сұйық реагент қолданылады. Яғни, көшеге себетін сұйықтықтың 24%-ы тұз ерітіндісі, қалған бөлігі судан тұрады. Аталмыш көліктер қардың алдында, қар жаумай тұрып көшелерге арнайы сұйықтықты сеуіп шығады. Ол жолдарда мұз қатпауы үшін жасалады. Сұйықтық шашатын аспалы жабдығы көліктің артында орнатылған. Ол 12 метрге дейін реагент шаша алады. Жалпы, сұйықтықтың көлемі 30 шақырымға дейін жетеді. Сондай-ақ, айтылған техника жаз кезінде де көше тазалығы үшін жұмыс істей алады, оған бөлек арнайы жабдығы бар. Қазір бұл көліктердің тиімділігі іс жүзінде тағы бір рет тексеріледі. Егер жақсы нәтиже көрсететін болса, алдағы уақытта мұндай көліктердің саны көбейеді деп үміттенеміз», – деді «Алматы Тазалық» МКК Бостандық ауданы бойынша бөлім басшысының орынбасары Есімханов Ерсін Жұмабайұлы.
«Алматы Тазалық» МКК өкілі аталмыш техниканың қоршаған ортаға зияны жоқ екенін де хабарлады.
- Техниканың қоршаған ортаға зияны жоқ. Сұйықтық себілген соң, ешқандай қоқыс қалмайды. Бұрын біз тұзбен араласқан құм шашатынбыз. Ол кейін қала жолдарында балшыққа айналып, қала тұрғындарына қолайсыздық тудыратын. Су мен тұз араласқандықтан, реагентте ешқандай қалдық болмайды, су ағып кетеді. Көлікті басқарып, тазалық жұмыстарын жүргізуге бір ғана жүргізуші жеткілікті, – деді ол.