Қала тұрғындары мен қонақтары үшін сақтық шараларын сақтауды сұраймыз
Күннің суытуына байланысты Алматының коммуналдық қызметі күшейтілген жұмыс режиміне көшті, деп хабарлайды aqshamnews.kz Алматы қаласы Коммуналдық инфрақұрылымды дамыту басқармасына сілтеме жасап.
Алматыда көктайғаққа қарсы шараларға 800-ден астам техника мен 1400 жұмысшы жұмылдырылды.
14 қазаннан бастап Алматыда жауын-шашын басталды, кей кездері жаңбыр жауып тұр. «Қазгидромет» РМК болжауына сәйкес, 17 қазан күні қар жаууы мүмкін. Ауа температурасының төмендеуі көктайғақтың пайда болуына әкелуі ықтимал. Көктайғақ қаупіне байланысты, әсіресе әл-Фараби даңғылынан жоғары аймақтарда көлік иелеріне жазғы дөңгелектерін қысқыға ауыстырғаны жөн.
Коммуналдық қызметтер көктайғаққа қарсы жұмыстарды жедел түрде жүргізуге дайын. Бұл жұмысқа 10 мердігер ұйым, 841 техника және 1405 жұмысшы тартылды. Көктайғаққа қарсы 76 тонна материал дайындалды.
Жолда көктайғақ болуы мүмкін, сондықтан жүргізушілер жылдамдықты азайтып, көлік арақашықтығын сақтап, шұғыл бұрылудан аулақ болуы керек, себебі апат қаупі артады. Жаяу жүргіншілер де тротуарларда жұқа мұздың пайда болу қаупіне байланысты сақ болуы қажет.