Алматы қаласының әкімі Дархан Сатыбалдының төрағалығымен «Таза Қазақстан» жалпыреспубликалық экологиялық акциясының жүзеге асырылу барысына арналған жұмыс кеңесі өтті.
Қала әкімі экология мен абаттандыру мәселесіне жүйелі түрде қараудың маңызын атады. Осыған орай, қала аумағын көгалдандырумен, санитарлық тазалықпен және жайлы қалалық ортаны қалыптастырумен айналысатын жаңа арнайы кәсіпорын құру тапсырылды.
«Бұл құрылым тек көгалдандыру мен абаттандыруға, қалада жайлы орта құруға жауапты болуға тиіс. Олар өздері жергілікті жерлерге шығып, жағдайды жақсартуға болатын аумақтарды анықтауы қажет», — деді Дархан Сатыбалды.
Кеңесте «Таза Қазақстан» акциясының аралық қорытындысы да қаралды. Үшінші тоқсан басталғалы бері Алматыда 3 мыңнан астам адамның қатысуымен 30-ға жуық іс-шара өткізілді.
Тұрғындармен байланыстың тиімді құралы ретінде TazaQazBot цифрлық платформасы жұмысын жалғастыруда. Жыл басынан бері осы бот арқылы тұрғындардан 4 мыңнан астам өтініш түскен.
Талқылау барысында қаланың жасыл қорын күтіп-баптау жайы да сөз болды. Түгендеу кезінде 16 мыңнан астам қураған және апатты жағдайдағы ағаш анықталып, олардың 5 мыңнан астамы кесілді. Сонымен қатар санитарлық мақсатта бұтақтарын кесу, бұта отырғызу және буферлік жасыл аймақтарды абаттандыру жұмыстары қатар жүргізіліп жатыр.
Басты мәселенің бірі — автоматты суару жүйелерінің жұмысқа жарамдылығы. Мониторинг барысында 56 учаскеде ақаулар анықталып, бұл көпжылдық жасыл желектердің жағдайына тікелей әсер етіп отыр. Осыған байланысты әкім жүйелердің үздіксіз жұмысын бақылауды күшейтіп, жасыл аймақтарды сапалы күтіп-баптауды қамтамасыз етуді тапсырды.
Кеңес қорытындысы бойынша шаһар басшысы бекітілген жоспарға сәйкес іс-шараларды бұлжытпай орындау, тұрғындардың экологиялық сауатын арттыру бағытындағы жұмысты жандандыру және кәсіпорындар мен ұйымдардың, қала тұрғындарының көптеп қатысуымен сенбіліктерді жүйелі түрде өткізу сынды бірнеше нақты тапсырма берді.