Мамандардың айтуынша, кіндік бауының ерекше ұзын болуы көп рет оралуына қарамастан, сәбидің денсаулығына зиян келтірген жоқ, деп хабарлайды aqshamnews.kz тілшісі.
Алматы №1 қалалық перзентханасында сирек кездесетін клиникалық жағдай тіркелді. Сәби кіндік бауы мойнына алты рет оралып дүниеге келді.
Мамандардың айтуынша, кіндік бауының ерекше ұзын болуы көп рет оралуына қарамастан, сәбидің денсаулығына зиян келтірген жоқ.
«Әдетте кіндік бауының қалыпты ұзындығы 50-70 сантиметрді құрайды. Кейде оның ұзындығы 40 сантиметрден де қысқа болады. Ал бұл жағдайда кіндік бауының ұзындығы 200 сантиметрге жеткен. Сонда да ұрықтың денсаулығына қауіп төнген жоқ», - дейді №1 перзентхананың пациенттерді қолдау және ішкі аудит қызметінің жетекшісі Зульфия Нашекенова.
Босану кезінде акушерлер тобы нәрестенің жүрек соғысы мен жағдайын кардиотокография (КТГ) арқылы үздіксіз бақылаған. Заманауи босану залдарындағы медициналық жабдық ұрықтың жағдайындағы ықтимал ауытқуды дер кезінде анықтап, босандыру тәсілін дұрыс таңдауға мүмкіндік береді.
Босану барысында кіндік бауының тартылуы оның қан тамырларының қысылуына, қан айналымының бұзылуына және ұрықтың оттегі тапшылығына ұшырауына әкелуі мүмкін. Бұл жолы мұндай асқыну болған жоқ. Босану еш қиындықсыз өтіп, тіпті дәрігерлерге кесарь тілігіне жүгінудің қажеті болған жоқ.
«Мен акушерлік салада 27 жылдан бері еңбек етіп келемін. Интернатураны аяқтағаннан кейін осы перзентханада жұмысымды бастадым. Содан бері осында қызмет етіп жүрмін. Өз тәжірибемде кіндік бауының бірнеше рет оралуы екі рет кездесті. Алғашқы жағдайда кесарь тілігі кезінде кіндік бауының мойынға жеті рет оралғанын анықтадық. Екінші рет - осы жолы, табиғи жолмен босану кезінде алты рет оралған жағдай тіркелді. Мұны медициналық ғажайып деуге болады», - дейді №1 перзентхананың дәрігер акушер-гинекологы Гаухар Джаксылыкова.
Кіндік бауы мойнына алты рет оралғанына қарамастан, сәби қанағаттанарлық жағдайда дүниеге келді. Жаңа туған нәрестенің жағдайын бірден бағалауға мүмкіндік беретін Апгар шкаласы бойынша ол 7-8 балл жинады. Бұл шкала нәрестенің тыныс алуын, жүрек соғысын, бұлшықет тонусын, рефлекстерін және тері түсін бағалауға негізделген.
Перзентхананың неонатолог дәрігерлері нәрестеге қажетті диагностикалық тексерудің толық кешенін жүргізіп, оның ана құрсағынан тыс өмірге жақсы бейімделгеніне көз жеткізді.
Нұржамал ӘЛІШ