Алматыда тәулік бойы толассыз жаңбыр жауды. Қаланың жол қызметтері күшейтілген режимде жұмыс істеп жатыр, - деп хабарлайды Аqshamnews.kz тілшісі.
Алматыда 16 қыркүйекте сағат 16:00-ден бастап нөсер жауды.
"Қазгидромет" РМК дерегінше, қалада бірнеше сағат ішінде 12 мм, ал тау бөктеріндегі жерлерде 15 мм жаңбыр жауды. Бұл жаңбырдың бір айлық мөлшерінің 53%-ы (қыркүйек айындағы норма-28 мм).
Жаңбыр салдарынан болған зардаптарды жою үшін 96 бірлік арнайы техника, 40 мотопомп, 19 ассенизатор машинасы (оның 9-ы алдын ала су басуы мүмкін жерлерге жеткізілді), 416 жол жұмысшысы, 2400 қап құм, мотопомпалармен және қажетті құрылғылармен жабдықталған 71 жедел мобильді бригада жедел іске кіріскен еді.
Жауын салдарынан болған зардаптарды жоюға ТЖД, РЖҚО, Алматы құтқару қызметінің күштері, сондай-ақ мердігер ұйымдар тартылды. Мердігерлерді қоспағанда барлығы 23 қызметкер, 7 бірлік техника, тіркеме және тасымалданатын мотопомпалар жұмылдырылды.
Нөсер жауынның және арық желісінің жаңбыр суына толып кетуі салдарынан қаланың жоғарғы бөлігінде автомобиль жолдарының кейбір учаскелері су астында қалды.
Ең үлкен жүктеме Аманжол көшесінде болды, мұнда жол төсемінің опырылуы салдарынан 13 автокөліктің зақымдануы тіркелді. Әуезов ауданы әкімі аппаратының дерегінше, бұған дейін бұл учаскеде "Спецстрой Групп ЛТД" ЖШС мердігерлік ұйымы сумен жабдықтау және кәріз желілерін салу жұмыстарын жүргізген. "QazaqGaz" ақ газ құбырының жоспарланған құрылысына байланысты асфальтбетон жабыны толық қалпына келтірілмеген.
Ауданның жаңбыр суы арық науалары арқылы дәл осы көшеге ағып кетеді, бұл жүктемені едәуір арттырады. Сонымен қатар, инженерлік желілердің терең төсемі топырақтың негізін әлсіретті. Қатты жаңбырмен бірге бұл жабынның шөгуіне және бұзылуына әкелді.
Қазір Аманжол көшесі жабылды. Ертең зақымдалған көліктерді эвакуациялау, топырақты шығару және орнын толтыру басталады. Мердігер ұйым зардап шеккен көліктердің иелеріне келтірілген зиянды өтеуге міндеттенді. Жағдай әкімдіктің бақылауында.
Тағы бір проблемалық учаске - Манас пен Жандосов көшелерінің қиылысы. арық желісі су астында қалды. Негізгі себеп-асфальтталған жабын, бұл судың ағып кетуін қиындатуда. Зардаптарды жою үшін "Алматы тазалық"МКК бригадалары сол жерге аттанды. Арықты тазарту, су ағызу жұмыстары жүргізілді, қапшықтар мен қоршаулар қойылды. Арық жүйесінің одан әрі тұрақты жұмысын қамтамасыз ету үшін асфальт жабынын ашу жоспарланып жатыр.
Барлық су тасқыны жойылды, көлік қозғалысы қалпына келтірілді. Түнде қауіпсіздікті қамтамасыз ету үшін 189 бірлік техника мен 180 жұмысшы кезекшілік етеді.
"Қазгидрометтің" ауа райы болжамы:
- 17 қыркүйек – бұлтты, жауын-шашынсыз, күндіз + 18...+20 °C.
- 18 қыркүйек - кей жерлерде жаңбыр жауып,найзағай ойнайды, түнде және таңертең тұман, күндіз + 16...+18 °C дейін.
- 19 қыркүйек- ауа райы болжамы осыған ұқсас, кей жерлерде жаңбыр мен найзағай, күндіз температура +16...+18 °C.