Талантты жас қаламгер әрі суретші Ильяс Юсуфжановтың «Керей мен Жәнібек» атты комиксі жарық көрді. Қазақ және орыс тілінде шыққан комикстің таныстырылымы бүгін Алматыда өтті деп хабарлайды Almaty-aqshamy.kz.
Комикс жанры елімізде кенжелеп қалған жанр екені мәлім. Сондықтан да Ильяс Юсуфжанов секілді жас таланттардың аталған жанрда еңбектеніп, қазақ мемлекеттілігіне қатысты тарихи деректерді жастарға мейлінше өтімді тәсілмен жеткізуі айрықша мәнге ие. Комикстің таныстырылымына жиналған қауым пікірі де осыған топтасты.
Әуезов ауданында өткен әдеби шараға Алматы қалалық әкімдігі мен Әуезов ауданы әкімдігінің ресми өкілдері, қаламгер жазушылар мен зиялы қауым өкілдері қатысты. Сондай-ақ, авторды қолдауға оның қатарлас жастары, Ахмет Жұбанов атындағы музыкалық мектебінің Giovani Talenti камералық оркестрі, өзге де өнерпаздар қатысты.
Алматы қаласы әкімінің орынбасары Арман Қырықбаев пен Әуезов ауданы әкімі Абзал Егембердив жас авторға арнайы құттықтау хатын жолдады, өз қолдауларын жеткізді. Ресми құттықтауларда мәдени, тарихи құндылықтарды жастарға өтімді тәсілмен насихаттаудың маңыздылығына айрықша тоқталған. Бұл жағында нәтижелі еңбек еткен авторға шығармашылық табыс тілеген.
Қазақстан Жазушылар одағы төрағасының бірінші орынбасары Нұржан Қуантайұлы да қаламгерлер ордасының сәлемін жеткізіп, Ильясты өз қатарларына қабылдағанын сүйіншіледі. Осылайша Ильяс Юсуфжанов Қазақстан Жазушылар одағының ең жас мүшесі атанды. Бұған қоса, комикс авторы «Бейбітшілік әлемі» халықаралық бірлестігі жағынан «Қазақстан Болашағы» төсбелгісімен марапатталды.
Әуезов ауданы Мәдениет және тілдерді дамыту бөлімінің басшысы Бану Манапова журналистерге: «Жастар арасында ұлттық құндылықтарды, тарихымызды насихаттауда «Керей мен Жәнібек» комиксі секілді еңбектердің тигізер көмегі мол. Себебі, ол жастардың қабылдауына жеңіл және ыңғайлы. Сол үшін біз авторды осы еңбегімен құттықтаймыз, әрі шығармашылығына қолдау көрсете бермекпіз», – деген пікірімен бөлісті.
Автор жайлы бірер сөз:
Ильяс Юсуфжанов – әдеби ортаға Ильяс Юсуф деген қаламатымен танылып келе жатқан жаз жазушы. Бұған дейін де бірнеше еңбектері жарық көріп үлгірген болатын. Ол «Қазақстандық ең жас қаламгер» ретінде жергілікті Гиннес рекордтар кітабына да енген.