Алматыда кәмелетке толмағандарға темекі және темекі өнімдерін заңсыз сату фактілеріне қарсы күрес жалғасуда.
Бұл туралы Алматы қалалық полиция департаментінің ресми өкілі Салтанат Әзірбек Өңірлік коммуникациялар қызметіндегі баспасөз конференциясында мәлімдеді, деп хабарлайды aqshamnews.kz.
Оның айтуынша, 2024 жылы 21 жасқа толмағандарға темекі мен темекі өнімдерін сату бойынша 160 құқықбұзушылық анықталды. Заңды бұзған кәсіпкерлер ҚР Әкімшілік құқық бұзушылық туралы кодексінің 423-1-бабына сәйкес әкімшілік жауапкершілікке тартылды.
«Заңға сәйкес, 21 жасқа толмаған азаматтарға темекі өнімдерін сату – құқықбұзушылық болып табылады. Жеке тұлғаларға 15 АЕК, ал шағын кәсіпкерлік субъектілеріне 25 АЕК мөлшерінде айыппұл қарастырылған», – деді спикер.
2025 жылдың басынан бері осыған ұқсас 27 құқықбұзушылықтың жолы кесілді. Билік жастарды темекі өнімдерінің зиянды әсерінен қорғау мақсатында бақылауды күшейтуде.
Сонымен қатар, азаматтардың денсаулығын қорғау шаралары аясында шылым шегуге болмайтын темекі өнімдерінің, соның ішінде электрондық тұтыну жүйелерінің мен хош иістендіргіштердің және оларға арналған сұйықтықтардың заңсыз айналымына қарсы қатаң шаралар қабылдануда. Вейптерді заңсыз сату үшін 200 АЕК-ке дейін айыппұл немесе 200 сағатқа дейін қоғамдық жұмыстарға тарту жазасы қарастырылған.
«Мемлекет жастарды никотин өнімдерінің зиянды әсерінен қорғау саясатын жүйелі түрде жүргізіп келеді. Заңды бұзғаны үшін жауапкершілік едәуір күшейтілді, сондықтан кәсіпкерлерді белгіленген талаптарды қатаң сақтауға шақырамыз», – деп атап өтті қалалық полицияның өкілі.