Алматы қаласында жыл басынан бері 9 300-ден астам қараусыз қалған жануар ұсталды, деп хабарлайды aqshamnews.kz
Бұл жөнінде Алматының Кәсіпкерлік және инвестициялар басқармасының өкілдері хабарлады.
Ұрықсыздандырып, екпе салынған соң 1 500 ит және 108 мысық үйренген жеріне қайта жіберілді. Ал 1 453 ит пен 93 мысық иесіне қайтарылған.
Қалада мемлекеттік ветеринарлық-санитарлық қызмет мамандарымен бірлескен жоспарлы және көшпелі тексерістер, сондай-ақ тұрғындардың өтініші бойынша жануарларды асырау жағдайына қатысты бақылау жалғасып жатыр.
Еске сала кетейік, биыл ақпан айынан бастап Алматыда иесіз жануарларға шұғыл ветеринарлық көмек көрсету қызметі жұмыс істеп келеді. Бұл қызмет жол-көлік оқиғасынан жарақат алу, биіктен құлау, улану, қауып алғанда инфекция тарау қаупі бар жағдайды және коллапс, жүрек-қантамыр жеткіліксіздігі, тыныс алу бұзылыстары сынды кенеттен пайда болатын ауыр халде дер уақытында көмек көрсету үшін құрылған.
Осы мақсатта екі мамандандырылған бригада жасақталып, алғашқы көмек көрсетуге және шұғыл диагностика жүргізуге қажетті барлық құрал-жабдықпен қамтамасыз етілген. Жарақаттанған жануарларды тасымалдауға арналған торлар, зембілдер және қажетті дәрі-дәрмектермен жабдықталған екі арнайы автокөлік пайдаланылады. Жедел ветеринарлық көмекке 8 708 595 64 04, 338 27 59 нөмірлері арқылы, сондай-ақ 109 – Бірыңғай қызметіне қоңырау шалуға болады.
Алматыда үй жануарларын тегін чиптеу бағдарламасы да қолға алынған. Ол биыл 15 шілдеде басталып, 2025 жылы желтоқсанға дейін жалғасады. Чиптеу жұмыстары ветеринарлық клиникаларда алдын ала жазылу арқылы жүргізіледі, сондай-ақ мамандар қалаішілік аумақтарды аралап, үйде де қызмет көрсетеді. Өтінім +7 707 968 79 29 WhatsApp нөмірі арқылы қабылданады.
