Алматыда белгілі журналист Батыр Қазыбаев туралы кітаптың тұсаукесері өтті, - деп хабарлайды aqshamnews.kz тілшісі.
12 маусымда Алматыда танымал журналист, Alash Media Group холдингінің басшысы Батыр Қазыбаевтың құрметіне арналған "Остаться светом" атты кітаптың тұсаукесері өтті.
Онда танымал медиаменеджерлер, журналистер мен тұлғалар жиналды. Олардың қатарында Ләйлә Сұлтанқызы, Зейнеп Ахметова бар.
Бұл жинақ – Батыр Қазыбаевтың өмірі мен еңбегі туралы естеліктерден құралған. Кітаптың жарық көруіне оның отбасы мүшелері, әсіресе үлкен әпкесі, жақындары, достары мен әріптестері атсалысқан. Кітапта Батыр Қазыбаевтың өзі түсірген сирек архив суреттер де бар.
"Батыр небәрі 53 жыл өмір сүрді. Бірақ ұзақ өмір сүрген дара тұлғалармен тең дәрежеде еңбек етті. Оның журналистикадағы өзіндік стилі болатын. Ұлымның әріптестері оның еңбегін ұмытпайды деп сенемін. Есімі халық жадында сақталады", — деді Батырдың анасы Орынша Қарабалина-Қазыбаева.
Сондай-ақ, ол кітап авторларына және оның жарық көруіне үлес қосқан барша жанға алғысын білдірді.
Батыр Қазыбаев туралы не белгілі?
Батыр Қазыбаев – танымал қазақ жазушысы әрі журналисі Кәкімжан Қазыбаевтың ұлы. Ол өмір бойы медиасалада еңбек етіп, Alash Media Group холдингін басқарды. Бұл холдинг құрамында Tengrinews.kz, Vesti.kz, Massaget.kz сайттары мен "Жұлдыз FM" және "Ретро FM Қазақстан" радиолары бар. Сонымен қатар, ол The Spirit of Tengri этникалық музыка фестивалінің негізін қалаған және "Жетінші арнаның" іргетасын қалаушылардың бірі болған.
Белгілі медиаменеджер 2022 жылы ұзаққа созылған ауыр дерттен кейін өмірден озды.