Белгілі боксшының жоғалғаны туралы бұдан бұрын хабарлағанбыз.
Танымал қазақстандық боксшы Серік Нұрқазов тірі табылды, ол қазір туыстарының қамқорлығында, деп хабарлайды Almaty-akshamy.kz
Алматы полиция департаментінің баспасөз қызметі хабарлағандай, Медеу ауданында жоғалып кеткен бұрынғы спортшы Серік Нұрқазов 26 желтоқсанда тірі табылды.
"1959 жылы туған азамат Нұрқазов Серік аман-есен табылды. Ол туыстарына тапсырылды. Бұрын хабарланғандай, жоғалған азаматтың қайда екенін анықтау мақсатында арнайы жедел-іздестіру тобы құрылды", - деп хабарлады полиция.
Серік Нұрқазов 14 желтоқсаннан бері іздеуде болған, оның жоғалып кеткені туралы "Қоғам" іздестіру тобының еріктілері хабарлаған. Медеу ауданындағы 64 жастағы ер адам үйінен шығып кетіп, қайтып оралмаған.
Серік Нұрқазов – қазақтың атақты боксшысы. Ол 1980 жылдары КСРО құрамасында ойнаған. Ел біріншілігінің үш дүркін чемпионы, Еуропа чемпионы, Гаванадағы әлем чемпионатының және халықаралық Достық турнирінің күміс жүлдегері, КСРО-ның еңбек сіңірген спорт шебері. Спорттық мансабын аяқтағаннан кейін бокстан балалар жаттықтырушысы болды, облыстық оқу-жаттығу орталығының меңгерушісі – облыстық жоғары спорт шеберлігі мектебінің директоры қызметтерін атқарды.