Биыл «Дене шынықтыру және спорт туралы» ҚР Заңына бірқатар өзгеріс енгізілді. Оның ішінде ұлттық, олимпиадалық, паралимпиадалық, сурдлимпиадалық спорт түрлері теңестіріліп, басым спорт түрлері қатарына кірді. Қазір елімізде 11 ұлттық спорт түрі дамып келе жатыр.
200 мыңнан астам азамат тоғызқұмалақпен шұғылданады. Ал, жалпы 600 мыңнан астам адам ұлттық спорт түрлерімен айналысады. Олар барлық спортшының 9,6%-ын құрайды, - деп хабарлайды Aqshamnews.kz.
Бұл туралы ҚР Туризм және спорт министрлігі Спорт және дене шынықтыру істері комитеті төрағасының орынбасары Аманбай Нұрмұханбетов ОКҚ алаңында мәлімдеді.
Оның айтуынша, ЮНЕСКО-ның материалдық емес мәдени мұралар тізіміне ұлттық спорт түрінің төртеуі енгізілді: құсбегілік, қазақ күресі, асық ату және тоғызқұмалақ.
«Тоғызқұмалақ спорт түрі елімізде қарқынды даму үстінде. Алматы қаласында 17-23 қараша аралығында жасөспірімдер арасында тоғызқұмалақтан ІІ Әлем чемпионаты өткізіледі. І Әлем чемпионаты 2023 жылы Алматы қаласында өткізілген. Республикалық федерация тарапынан үлкен жұмыс жүргізіліп, 2 жылда 1 рет өткізілетін болып бекітілген», – деді спикер.
Тоғызқұмалақтан жасөспірімдер арасындағы ІІ Әлем чемпионатына 20 елден спортшылар қатысады. І чемпионатта 16 елдің өкілдері бақ сынасқан. Биылғы жарыста классика онлайн/офлайн; рапид пен блиц офлайн өтеді.