Алматы қалалық ПД-да ерлік сабағына қаланың он жалпы білім беретін мектебінің “Жас сақшы” полиция сыныптарының оқушылары шақырылды.
Кездесудің тақырыбы: “Ауғанның отты жылдары”. Оған сондай-ақ Генералдар Кеңесі, Ауған соғысы ардагерлерінің қызметін үйлестіру Кеңесінің өкілдері, ІІО ардагерлері және т.б.қатысты, деп хабарлайды aqshamnews.kz.
– Мақсат – жас буын полиция қатысушыларын аға ардагерлермен таныстыру, Қазақстан полициясының имиджін көтеру, ерлік пен батылдыққа, Отанға деген сүйіспеншілік пен патриоттық рухты тәрбиелеу. Сонымен қатар, жастар арасында мейірімділік пен өзара қолдау көрсету мәдениетін, әлеуметтік байланыстарды, сондай-ақ айналадағы азаматтарға қамқорлық пен көмек көрсетуді насихаттау, - деді Қазақстан Республикасы Генералдар Кеңесі республикалық қоғамдық бірлестігінің төрағасы Бексұлтан Сәрсеков.
Ерлік сабағында ардагерлер оқушыларға мейірімділік пен жанашырлықтың, игі істер жасаудың, бір-біріне көмектесудің маңыздылығын айтып берді. Қатысушылар жанқиярлық еңбек көрсеткен ардагерлердің естеліктерін зор ықыласпен тыңдады. Шара барысында мектеп ішінде құқық бұзушылықтың алдын алуға бағытталған іс-шараларға белсене қатысып, полицияға көмек көрсеткен “Жас сақшы” взводының командирлері алғыс хаттармен марапатталды.