Алматы қаласында көрнекті мемлекет және қоғам қайраткері, медицина ғылымдарының кандидаты, профессор, еліміздегі акушерлік-гинекология саласының негізін қалаушылардың бірі Жалғау Шәкірұлы Исалиевке арналған мемориалдық тақтаның ашылу салтанаты өтті. Бұл туралы Aqshamnews.kz сайты хабарлайды.
Мемориалдық тақта ол көп жылдар бойы еңбек еткен Акушерлік, гинекология және перинатология ғылыми орталығының қабырғасына орнатылды. Салтанатты шара орталықтың 50 жылдық мерейтойына орай ұйымдастырылды.
Жалғау Исалиев – Қазақстанның денсаулық сақтау жүйесін қалыптастыруға елеулі үлес қосқан ірі тұлға. Ол Қазақ акушерлік және гинекология ғылыми-зерттеу институтының алғашқы директоры, көптеген буын дәрігерлердің ұстазы болған.
Салтанатты шарада сөз сөйлеген Алматы қаласы әкімінің орынбасары Әсем Нүсіпова Исалиевтің медицинаға сіңірген еңбегін жоғары бағалап, бұл бастаманың ғылыми орталық ұжымының ұсынысы екенін ерекше атап өтті.
Алмалы ауданы Қоғамдық кеңесінің төрағасы Батай Қабылов пен ҚазҰМУ ректоры Марат Шоранов та Исалиевтің кәсіби және адамгершілік қасиеттерін атап өтті.
Жалғау Шәкірұлының жұбайы, медицина ғылымдарының кандидаты Сара Рахманқұлқызы барлық қатысушыларға алғыс білдіріп, марқұм жұбайының өмірлік ұстанымы – "адам – мемлекеттің басты байлығы" екенін еске салды.