Алматыда өткен халықаралық 9-шы хирургтар конгресінде Қазақстандағы трансплантология саласының түйткілдері талқыланды.
Жиын Сызғанов атындағы Ұлттық ғылыми хирургия орталығының 80 жылдығына орай ұйымдастырылды, - деп хабарлайды Aqshamnews.kz.
Қазір елімізде мыңға жуық адам бауыр трансплантациясына кезекте тұр. Алайда биыл жыл басынан бері небәрі 40-тан аса операция жасалған. Бұл қажеттіліктің 5–6 пайызын ғана өтейді. Мамандардың айтуынша, басты мәселе – донор тапшылығы.
Тірі донорға иек артқанмен, көп жағдайда сәйкес келмейді. Ал мәйіттік донордың жетіспеуі талай науқастың өмірін қатерге тігіп отыр. Биыл трансплантациялардың 95 пайызы ересектерге жасалса, қалған аз бөлігі туа бітті дертке шалдыққан балаларға жасалған. Кейбір бүлдіршіндерді квота арқылы шетелге жіберуге тура келеді. Мәселен, 2025 жылдың өзінде 12 бала Үндістанда бауыр алмастырған.
«Біз тек тірі донорлықты дамыту арқылы бұл мәселені толық шеше алмаймыз. Қазір мәйіттік донорлық жүйесін жолға қоймайынша, кезек жылдан жылға азаймайды», – деді «А.Н. Сызғанов атындағы Ұлттық ғылыми хирургия орталығы» АҚ басқарма төрағасы Болатбек Баймаханов.
Мамандар заңға өзгеріс енгізіліп, мәйіттік донорлық институты дамыса, көптеген науқастың үміті қайта жанатынын айтады.