Халықаралық жастар күніне орай бірқатар арнайы акциялар жоспарланған. Бұл туралы Өңірлік коммуникациялар қызметінің брифингінде Алматы қаласы Жастар саясаты басқармасы басшысының міндетін атқарушы Азиз Кажденбек мәлімдеді, деп хабарлайды aqshamnews.kz
Алматы – жастар қаласы, мұнда 14 пен 35 жас аралығындағы 695,6 мың жас тұрады.
«1999 жылдан бастап бүкіл әлемде 12 тамызда Халықаралық Жастар күні атап өтіледі. Бұл жастарға, олардың жетістіктері мен әлеуетіне арналған ерекше күн. Біз қарқынды өзгерістер мен жаһандық сын-қатерлер дәуірінде өмір сүріп жатырмыз. Жастар батылдық пен шығармашылықтың үлгісін көрсете отырып, осы процестердің алдыңғы қатарында. Біздің міндетіміз – сапалы білім алуға, денсаулық сақтауға және жұмысқа орналасу мүмкіндіктеріне қол жеткізуді қамтамасыз ете отырып, олардың дамуы үшін қолайлы жағдайлар жасау», - деді Азиз Кажденбек.
Бұл күні қала кәсіпкерлерімен бірлесіп 14 пен 35 жас аралығындағы жастарға арналған «Jas Almaty» ауқымды акциясын өткізу жоспарлануда, оның шеңберінде қоғамдық тамақтану, пайдалы демалыс саласында жеңілдіктер жасалады.
3-12 тамыз аралығында «Taza Qazaqstan», «Jas kelse. Iske!» сияқты 10 бағыт бойынша 60-тан астам спорттық, мәдени және зияткерлік іс-шаралар өтеді. «Densaulyk – zor bailyk», «Gylym tappai maqtanba», «Meyirimdilik mekeni», «Adal Azamat», «Enbek barin de jenbek», «Ystyq qairat. Nurly aqyl. Jyly jurek», «Qorgan-24», «Jasratmen birge» іс-шаралары жастар арасында шығармашылық әлеует пен салауатты өмір салтын дамытуға ықпал етеді.
Іс-шараларға жастар қозғалысының өкілдері, қоғамдық пікір көшбасшылары, жас блогерлер мен қазақстандық шоу-бизнес жұлдыздары қатысады.
ӨКҚ спикері Алматыда жастардың әлеуетін толық іске асыру, сондай-ақ жастарға атаулы көмек көрсету мақсатында өткен жылы 8 жастар комьюнити орталықтарының іске қосылғанын атап өтті. Орталықтардың саны 2025 жылға дейін 16-ға дейін артады. Жалпы, 2024 жылдың басынан бері 750-ден астам іс-шара өткізіліп, оған жалпы саны 53 мыңнан астам жас қатысты.