Қазақ халқының дәстүрлі ән өнерінің көрнекті өкілі, халық композиторы Манарбек Ержановтың туғанына 125 жыл толуына орай Мультимедиалық дәстүрлі музыка орталығында тағылымды мәдени іс-шара өтті, – деп хабарлайды aqshamnews.kz тілшісі.
«Айтулы кештің басты мақсаты – ұлт руханиятына өлшеусіз үлес қосқан өнер тарланының шығармашылығын кеңінен насихаттау, сондай-ақ жас ұрпақтың ұлттық музыкаға деген қызығушылығын арттыру. Ұлттық өнер – ұрпаққа аманат. Ата-бабадан жеткен асыл мұраны сақтау мен дәріптеу – баршамыздың ортақ міндетіміз», – деді Мультимедиалық дәстүрлі музыка орталығының жетекшісі Роза Қаженова.
Іс-шара барысында дәстүрлі ән мектебінің үздік өкілдері сахна төріне шығып, Манарбек Ержановтың репертуарындағы таңдаулы шығармаларды орындады. Республикалық байқаулардың лауреаттары, Құрманғазы атындағы Қазақ ұлттық консерваториясының «Халық әні» кафедрасының студенттері де қатысып, көрермендерге жоғары деңгейдегі орындаушылық шеберлігін паш етті. Ән кеші ұлттық нақыштағы сахналық көріністермен, музыкалық композициялармен үйлесім тауып, көрерменге рухани әсер сыйлады.
Іс-шараға арнайы шақырылған қонақтар мен өнер жанашырлары ұлттық ән өнерінің мәні мен маңызына тоқталып, Манарбек Ержанов мұрасының қазақ мәдениетіндегі орны ерекше екенін атап өтті.