Алматы қаласының қылмыстық істер жөніндегі мамандандырылған ауданаралық сотында Гүлмира Сатыбалдының басты сот отырысы өтіп жатыр. Гүлмира Сатыбалдыдан бөлек, оның жүргізушісі Мәди Батыршаев та айыпталушылар қатарында, деп хабарлайды almaty-akshamy.kz
Тыңдаулар офлайн режимде өтуде. Айта кетейік, алдын ала тыңдалым кезінде айыпталушы Гүлмира Сатыбалды алқабилер сотына қатыспайтынын жеткізген болатын.
Өткен жылы Гүлмира Сатыбалды біреудің мүлкін иемдену және жымқыру қылмыстық ісі бойынша 8 жылға бас бостандығынан айырылып, 10 жыл бойы коммерциялық ұйымдарда басшылық лауазымдарды атқаруға тыйым салынған еді.
Сатыбалды кәсіпорындардың қатысу үлесін заңсыз иемдену, соның ішінде адам ұрлаумен ұштасқан екі факті бойынша тергеуге алынған болатын. Жәбірленушіге келген залал сомасы 6,6 миллиард теңгеден асады.
Сонымен қатар, сотқа дейінгі тергеу кезінде Гүлмира Сатыбалды шекара асып кетуге тырысқан.
Алайда, ол барлық айыптаулармен келіспейтінін және әділ шешім қабылдауға өтініш жасағанын мәлімдеді.
Еске сала кетейік, Қайрат Сатыбалды 2022 жылдың 26 қыркүйегінде қылмыстық ісі бойынша алты жылға сотталған болатын. 2024 жылдың басында Сыбайлас жемқорлыққа қарсы агенттік оған қатысты тағы бір істің тергеліп жатқанын хабарлады.