Ғ.Мүсіреповтің музей-үйінде Алматы қаласы әкімдігінің қолдауымен қазақ әдебиетінің классигі, академик-жазушы Ғабит Мүсіреповтің «ЕР АНА» атты әңгімелер жинағының таныстырылымы өтті.
“Кітап “Qasymkitap” баспасынан 1000 дана таралыммен жарық көрді. Құрастырушысы – Әділғазы Қайырбеков. Жинаққа қаламгердің «Боранды түнде», «Ананың анасы», «Ер ана», «Екінші Биаға», «Автобиографиялық әңгіме», «Жапон балладасы» сияқты 32 әңгімесі енген”, - дейді С.Мұқанов пен Ғ.Мүсіреповтің әдеби-мемориалдық музей кешенінің ғылыми бөлім жетекшісі Назгүл Алтаева.
Ұлттық сөз өнері тариxындағы зор тұлға Ғабит Мүсіреповтің шығармашылығын, әңгіме жанрындағы шеберлік құпиясын кеңінен насихаттау мақсатында өткен бұл іс-шараға ақын, Қазақстан Жазушылар одағы Басқарма төрағасының орынбасары, Қазақстанның еңбек сіңірген қайраткері Қасымхан Бегман, М.Әуезов атындағы Әдебиет және өнер институтының аға ғылыми қызметкері Гүлзия Пірәлі, ақын, ҚР Білім беру ісінің үздік қызметкері Кәмнұр Тәлімұлы, Алматы қаласы музейлер бірлестігі директорының Даму жөніндегі орынбасары Арын Сәрсембаев және басқа да әдебиет жанашырлары қатысып, ой-пікірлерімен бөлісті.
Құрманғазы атындағы Қазақ ұлттық консерваториясының студенті, дәстүрлі әнші Нұрасыл Мәдібек Ақан серінің әні «Жамал қыз» бен халық әні «Сұржелгеншені» орындап, тыңдаушыларды бір серпілтіп тастады.
Іс-шараны музей кешенінің аға ғылыми қызметкері Ә.Қайырбеков қорытындылады.