Алматы қаласында Аналар күніне арналған мерекелік іс-шара ұйымдастырылды. Шараны “Ахыска әйелдері” қоғамдық бірлестігі мен Түрік этномәдени орталығы бірлесіп өткізді. Мерекелік жиынға Қазақстан халқы Ассамблеясының өкілдері, қоғам белсенділері мен қала қонақтарының арасынан жалпы 350-ден астам әйел шақырылған, – деп хабарлайды aqshamnews.kz тілшісі.
Іс-шара барысында қонақтарға кең дастархан жайылып, аналарға арнайы сыйлықтар табысталды. Сонымен қатар түрлі байқаулар ұйымдастырылып, жеңімпаздарға бағалы сыйлықтар берілді. Кеш соңы концерттік бағдарламаға ұласып, өнерпаздардың музыкалық және шығармашылық қойылымдары көпшілік назарына ұсынылды.
Алматы қалалық Аналар кеңесінің және “Ахыска әйелдері” түрік этномәдени орталығы жанындағы Аналар кеңесінің төрағасы Зульфия Хусейнова аналардың еңбегі мен отбасыдағы рөлі әрдайым жоғары бағалануға тиіс екенін атап өтті.
“Аналар — отбасының берекесі мен ұлт тәрбиесінің негізі. Бүгін мерекелік дастархан жайып, аналарымызға құрмет көрсетуді жөн көрдік. Әрбір анаға сыйлықтар табыстап, жақсы көңіл күй сыйлағымыз келді”,– деді Зульфия Хусейнова.