Алматыда құлағы нашар еститін жүргізушіні мазақтап, видеосын жариялаған әйелдің тұлғасы анықталып, полиция бөлімшесіне жеткізілді, деп хабарлайды Aqshamnews.kz тілшісі.
Алмалы аудандық полиция бөлімі Нұрила Аманбаеваны профилактикалық әңгімеге шақырғанын мәлімдеді. Қоғамда резонанс тудырған ролик үшін сынға қалған, 63 мыңнан астам оқырманы бар блогер видеоны өшіріп, кешірім сұрады. Полиция оның кінәсін мойындағанын, түсіндіру жұмыстары жүргізілгенін атап өтіп, әлеуметтік желі қолданушыларын жариялайтын контентке жауапкершілікпен қарауға шақырды.
Блогердің айтуынша, ол такси жүргізушісінің отбасымен жеке кездесіп, жағдайды түсіндіріп, кешірім сұраған. Жүргізушінің туыстары өздерінің және жақындарының суреттерін жария етпеуді сұрап, тараптар келісімге келген.
Оқиғаға байланысты желіде пікір екіге жарылды: бірі блогерді қолдаса, енді бірі оның әрекетін қатаң айыптап, жауапкершілікке тартуды талап етті.
