Әлеуметтік желіде әнші Ерболат Құдайбергенге ұқсас адамның есірткі іздеп жүрген видеосы тарады. Ролик авторлары кадр сыртында өнерпазды ұстап, наркодиспансерге жеткізді деп мәлімдеген. Оқиғаға қатысты полиция пікір білдірді, – деп хабарлайды aqshamnews.kz тілшісі.
Не жағдай болды?
Өткен аптада «Мен қазақпын» әнін орындайтын әншінің ұсталғаны туралы ақпарат әлеуметтік желіде тарай бастады. Пабликтердің бірінде жарияланған видеода әнші болуы мүмкін екені айтылған.
«Видео авторы Алматыдағы наркологиялық орталық маңында танымал әнші Ерболат Құдайбергеновті түсірдім» деген мазмұнда жазба да қоса берілген.
Алматы полициясының түсіндірмесі
Алматы қалалық полиция департаменті редакцияның ресми сұранысына берген жауабында оқиғаға көршілердің шағымы себеп болғанын айтты.
«Полицияға көпқабатты үй тұрғындарынан көршісінің агрессивті әрекет жасап, қоғамдық тәртіпті бұзып жүргені туралы өтініш түсті. Учаскелік инспектор оқиға орнына дереу барды. Ақпарат расталды: ер адам адекватсыз күйде болып, агрессия танытқан және айналасындағылардың тыныштығына қауіп төндірген», – деді полицияда.
Осыдан кейін ер адам медициналық куәландыруға жіберілген. Сараптама оның психоактивті заттардың әсерінде болғанын көрсеткен.
«Медициналық көрсеткіштерді ескере отырып және қайталануы мүмкін құқыққа қайшы әрекеттердің алдын алу мақсатында ол мамандардың бақылауымен 15 тәулікке мамандандырылған медициналық мекемеге орналастырылды», – делінген полиция жауабында.
Полиция өкілдері ұсталған адам ӘҚБтК-нің бірнеше бабы бойынша әкімшілік жауапкершілікке тартылғанын да хабарлады. Атап айтқанда:
азаматтардың тыныштығын бұзу;
психоактивті заттарды қолданудан болған күйде қоғамдық орынға шығу;
тіркеусіз тұру;
қоғамдық орындарда азаматтарға тиісу.
Сондай-ақ департамент ер адамның бұған дейін де қоғамдық тәртіп бұзғаны үшін жауапкершілікке тартылғанын мәлімдеді.
Әншінің менеджерінің пікірі
Aqshamnews.kz тілшісі әншінің өкілімен байланысқан. Артистің менеджері видеодағы оқиғаға әншінің қатысы барын жоққа шығарды:
«Иә, видеоны көрдім, бұл – шындыққа жанаспайтын ақпарат. Кадрлардан оның қыс мезгілі емес екені байқалады. Видеода ол ма, жоқ па, нақты айта алмаймын. Біз жалған ақпарат таратқан пабликтерге арыз береміз», – деді ол.
Менеджердің айтуынша, қазір әнші Алматыда.