Алматыда 2024 жылдың 20 қыркүйегінде Еңбек күніне арналған жалпы қалалық Бос орындар жәрмеңкесі өтеді.
Бұл туралы Өңірлік коммуникациялар қызметінің брифингінде Мансап орталығының басшысы Әділет Жаңабаев мәлімдеді, деп хабарлайды aqshamnews.kz.
Жәрмеңкеде қаланың 60 кәсіпорны ұсынылады, олар 300-ден астам жұмыс орнына 1000-нан астам бос жұмыс орындарын ұсынады.
«Жәрмеңкенің негізгі мақсаты оқу орындарының түлектерін және барлық жұмыс іздеушілерді жұмысқа орналастыруға жәрдемдесу болып табылады. Іс-шараға қызмет көрсету, қаржы, өндіріс, сауда, қоғамдық тамақтану және басқа да салалардың өкілдері қатысады. Жұмыс іздеушілер жұмыс берушілермен жеке сөйлесе алады, өз түйіндемелерін ұсына алады, жұмыс шарттарын талқылай алады және алдын ала әңгімелесуден өте алады», - деп бөлісті Ә.Жаңабаев.
Жәрмеңкенің өтетін орны: Жібек жолы даңғылы, Панфилов көшесі қиылысы (Арбат) сағат 14:00-де.
Жәрмеңкеде жастар мен жұмыссыз азаматтарға ерекше көңіл бөлінеді.
Сонымен қатар, спикер халықты жұмыспен қамтуды қолдауға бағытталған бірқатар мемлекеттік бағдарламалар туралы да атап өтті. Қатысушылар сұранысқа ие мамандықтар бойынша тегін кәсіптік оқудан өте алады, сондай-ақ «Жастар практикасы» және «Алғашқы жұмыс орны» бағдарламаларын пайдалана алады.
Толығырақ ақпаратты Достық даңғылы, 85 мекенжайында орналасқан Алматы қаласының Мансап орталығынан немесе + 7 727 310-47-82 телефон нөмірі бойынша алуға болады.