Алматыда өткен «Стоп-бұзушылық» жедел-профилактикалық іс-шарасы барысында екі күн ішінде 4 828 жол ережесін бұзу дерегі тіркелді, деп хабарлайды Aqshamnews.kz тілшісі Polisia.kz-ке сілтеме жасап.
Іс-шара барысында жол қозғалысы қауіпсіздігіне тікелей қауіп төндіретін өрескел заңбұзушылықтарға ерекше назар аударылған. Нәтижесінде көлік жүргізу құқығы жоқ адамдардың тізгінге отыруының 44 дерегі, сондай-ақ бұрын жүргізуші куәлігінен айырылған тұлғалардың көлік басқаруының 8 фактісі анықталған.
Сонымен қатар жалған мемлекеттік нөмір қолданудың 8 дерегі мен қарсы бағытқа шығудың 15 жағдайы тіркелген.
Жүргізілген жұмыстар аясында 2 мыңнан астам көлік арнайы тұрақтарға қойылды. Олардың қатарында шетелдік тіркеудегі автокөліктер де бар.
Алматы қалалық Полиция департаментінің әкімшілік полиция басқармасының бастығы Абдинур Тасыбаевтың айтуынша, полиция жолдағы қауіпсіздікке тікелей әсер ететін өрескел бұзушылықтарды анықтауға басымдық беріп отыр.
Еске салайық, 1 сәуірде Алматыда «Стоп-бұзушылық» жаппай операциясы басталған болатын. Оған Қазақстанның әр өңірінен полиция экипаждары тартылған. Алғашқы тәуліктің өзінде 2 200-ден астам құқықбұзушылық анықталған.
Қоғамдық тәртіп пен жол қауіпсіздігін күшейту үшін қалаға Астана, Ақмола, Қарағанды және Жамбыл облыстарынан қосымша күштер жұмылдырылған.
Айта кетейік, 21 наурызда Алматыда резонанс тудырған жол апаты болған еді. Әл-Фараби даңғылы мен Меңдіқұлов көшесінің қиылысында Mercedes пен Zeekr көліктері соқтығысып, салдарынан үш адам қаза тапқан. Zeekr жүргізушісі мас күйде болған.
Сонымен қатар мемлекеттік нөмірлердің заңсыз берілуі мүмкін деген күдікке байланысты ішкі қауіпсіздік департаменті қылмыстық іс қозғап, бірқатар лауазымды тұлғалар қызметінен босатылды.