Алматыда бұқаралық ақпарат құралдары қызметкерлері марапатталды, – деп хабарлайды aqshamnews.kz тілшісі.
Алматыда жыл сайын 28 маусымда атап өтілетін Бұқаралық ақпарат құралдары қызметкерлері күні қарсаңында ақпарат саласы өкілдерін салтанатты марапаттау рәсімі өтті.
Іс-шараға Алматы қаласы әкімінің орынбасары Абзал Нүкенұлы қатысып, журналистер қауымын кәсіби мерекемен құттықтады. Ол бұқаралық ақпарат құралдарының қоғам өміріндегі маңызды рөлін атап өтіп, журналистердің елдегі реформаларды кеңінен насихаттауға, азаматтарды объективті ақпаратпен қамтамасыз етуге және қоғамдық пікірді қалыптастыруға қосып жүрген үлесіне жоғары баға берді.
Салтанатты рәсім барысында Қазақстан Республикасы Президентінің 2026 жылғы 23 маусымдағы №1325 Жарлығына сәйкес бұқаралық ақпарат құралдарының бірқатар қызметкері «Ерен еңбегі үшін» және «Шапағат» мемлекеттік наградаларымен марапатталды.
Сонымен қатар медиа саласының бір топ өкіліне Қазақстан Республикасы Мәдениет және ақпарат министрлігінің ведомстволық наградалары – «Ақпарат саласының үздігі» төсбелгісі, Құрмет грамоталары мен Алғыс хаттары табысталды.