Алматы қаласының Индустриалды аймағында автомобиль және арнайы техникаға арналған лак-бояу өнімдерін шығаратын жаңа зауыт құрылысы басталды. Бұл туралы Aqshamnews.kz сайты хабарлайды.
11,1 млрд теңге көлемінде инвестиция тартылған жобаның іске қосылуы 2026 жылдың үшінші тоқсанына жоспарланған. Зауыттың қуаттылығы жылына 6 091 тоннаны құрап, Қазақстандағы лак-бояу өнімдеріне деген ішкі сұраныстың 11%-ын өтей алады.
Кәсіпорында автокөліктер, автобустар, жүк көліктері, ауыл шаруашылығы және құрылыс техникаларына арналған бояулар, жол белгілеріне арналған материалдар, сондай-ақ жалпы өндірістік және қорғаныш жабындары өндірілмек.
Жоба аясында 84 жаңа жұмыс орны ашылып, лак-бояу технологиясы мен колористика саласында 6 жаңа мамандық енгізіледі. Өндірістік процестер Қытай және Нидерланды серіктестерімен бірлесіп іске асырылмақ.
ТОО бас директоры Төреәлі Құрмановтың айтуынша, бұл – Орталық Азиядағы алғашқы автомобильге арналған лак-бояу зауыты болмақ. Жобаның 80%-ы бұрын Қазақстанда өндірілмеген өнімдерден тұрады. Нарыққа алғаш рет Made in Kazakhstan таңбасымен бояу шығарылады. Негізгі тұтынушылар ретінде автомобиль, мұнай-газ және тау-кен салаларындағы кәсіпорындар көзделуде. Astana Motors-тың екі зауытымен офтейк-келісімшарт жасалған.
Алматы қаласы әкімінің орынбасары Әлішер Әбдіқадыров: «Автомобиль өндірісі жылына орта есеппен 20% өсіп келеді. Соңғы бес жылда бұл сала қаланың өнеркәсіп құрылымының 30%-ын құрады. Лак-бояу зауыты жоғары қосылған құны бар өндірісті дамытып, экономиканың әртараптануына серпін береді», – деді.
Айта кетейік, 2025 жылы Алматы индустриалды аймағында жалпы құны 135,4 млрд теңгеге 11 жоба іске қосылады.