Бүгін Алматы қаласы әкімінің орынбасары Абзал Нүкенов бірқатар білім және мәдениет саласы қызметкерлеріне мемлекеттік наградалар табыстады, – деп хабарлайды aqshamnews.kz тілшісі.
Мәдениет саласындағы елеулі еңбегі және Қазақстан Республикасы алдындағы айрықша қызметі үшін «Парасат» орденімен Қазақстан Республикасының еңбек сіңірген қайраткері, «Дарын» мемлекеттік жастар сыйлығының иегері, «МузАрт» тобының әншісі, продюсер және тележүргізуші Сәкен Қордабайұлы Майғазиев марапатталды.
Білім беру саласындағы ұзақ жылғы жемісті еңбегі үшін «Құрмет» орденімен Қазақстан Республикасының білім беру саласының құрметті қызметкері, Оқу-ағарту министрлігінің «Құрмет» грамотасының және Ыбырай Алтынсарин атындағы төсбелгінің иегері Атығай Бүркітбаевич Бижанов марапатталды.
Ел игілігі жолындағы елеулі еңбегі, кәсіби қызметіндегі жоғары жетістіктері және Қазақстан Республикасының дамуына қосқан зор үлесі үшін «Құрмет» ордені «ТҮРКСОЙ» халықаралық ұйымындағы Қазақстан Республикасының өкілі Нышанкүл Қансейітқызы Қаратаеваға табысталды.
Сондай-ақ қазақ өнерінің дамуына қосқан сүбелі үлесі, шығармашылық қызметіндегі жоғары жетістіктері және мәдениет саласын дамытудағы еңбегі үшін Кенжебек Тұрсынбайұлы Жанәбілов «Құрмет» орденімен наградталды.
Рәсім барысында Абзал Нүкенұлы марапат иелерін жоғары наградаларымен құттықтап, олардың кәсіби қызметі мен ел дамуына қосқан үлесі мемлекет тарапынан әрдайым жоғары бағаланатынын атап өтті.