Алматыда өткен жиында Бас редакторлар мен ҚХА журналистер клубы бірлесе БАҚ-та этносаралық және діни мәселелерді жариялау жөнінде Этикалық кодекс қабылдау, арнайы медиа кеңесін құру, “толеранттылық және медиаэтика” пәнін журналистика мамандықтарына енгізуді талқылады, - деп хабарлайды aqshamnews.kz.
Бұл туралы журналист, депутат Бибігүл Жексенбай ФБ парақшасында жазды.
Бас редакторлар клубы мен ҚХА журналистер клубы арасында әріптесім Алишер Сатвалдиевпен Меморандумға қол қойдық.
Мақсат — этносаралық қатынастарды бұқаралық ақпарат құралдарында жариялау мәдениетін қалвптастыруда бірлесе жұмыс жүргізу.
Көпэтносты Қазақстан үшін БАҚ-тың рөлі айрықша. Әрбір сөз, әрбір жарияланым қоғамдағы сенім мен татулыққа әсер етеді.
Сондықтан журналистің кәсіби этикасы — бұл тек мамандық талабы емес, ұлттық қауіпсіздік пен қоғамдық келісімнің кепілі.
Көптеген елдерде этносаралық тақырыптарды жариялауда нақты этикалық нормалар бар.
- Мысалы, Ұлыбританияда Ofcom өшпенділік тіліне жол бермейді;
- Канадада журналист осы бағыттағы “нәзік” тақырыптарды этностық топтармен кеңесіп барып жазады;
Еуропа Кеңесінің хартиясында: «Журналист қоғамды бөлуге емес, түсіністікке қызмет етуі тиіс», — делінген. Бұл — жауапты журналистиканың ортақ қағидаты.
Біздің елде 130-дан астам этнос өмір сүреді, сондықтан сөз мәдениеті – келісім мәдениетімен тікелей байланысты.
Алматыда өткен жиында Бас редакторлар мен ҚХА журналистер клубы бірлесе БАҚ-та этносаралық және діни мәселелерді жариялау жөнінде Этикалық кодекс қабылдау, арнайы медиа кеңесін құру, “толеранттылық және медиаэтика” пәнін журналистика мамандықтарына енгізуді қарастыруды талқыладық.
Бұл шаралар сөз бостандығын шектеу емес — сенім мен кәсібилікті арттыру тетігі.
Халқымыз «Бірлік бар жерде – тірлік бар» дейді. Ақпараттық дәуірде бұл қағида бұрынғыдан да өзекті.
Біздің міндетіміз — сөз арқылы келісімді, түсіністікті және өзара құрметті нығайту.
