Алматыда осы жазда Орталық Азиядағы алғашқы әлемдік деңгейдегі Балалар ғылыми музейі ашылады, – деп хабарлайды aqshamnews.kz тілшісі.
Almaty Children's Science Museum деп аталатын бұл жоба жай ғана музей емес, болашақ ұрпақтың ғылымға деген қызығушылығын оятатын, шығармашылық ойлауын дамытатын және жаңа буын зерттеушілерін тәрбиелейтін заманауи бірегей білім беру кеңістігі болмақ.
Ұлттық ғылым академиясында осы бірегей жоба таныстырылып, оның тұжырымдамасы және елдің ғылыми әлеуетін дамытудағы рөлінің қандай болатыны талқыланды.
Толығымен мемлекет қаржыландырып отырған жоба әдеттегі өзімізге таныс классикалық мұражай емес, ғылыми теория мен тәжірибенің қатар ұштасатын жаңа білім беру ортасы ретінде қызмет етпек.
Балалар музейінің басты символы алма болады. Ұлттық ерекшелікке сай бейімделетін ғылыми кеңістікте интерактивті зертханалар, галереялар ашылып, ғылым, технология, инженерия, математика мен жасанды интеллектке арналған тәжірибелік сабақтар, дәрістер ұйымдастырылады.
Сондай-ақ ойын баласын баурап алатын алаңдары бар KidsSTOP аймағы мен «Жібек жолындағы ғылым», «Ғарыш кеңістігі» секілді тақырыптық бөлімдер жұмыс істейді. Мәселен, «Жібек жолындағы ғылым» қазақ халқының көшпелі кезеңдегі ғылыми жетістіктері мен қазіргі қолданысы таныстырылады. Әрбір құбылыстың ғылыми негізі түсіндіріледі. Ал экология бөлігінде, мәселен Арал теңізінің тартылу себептері, оны қалпына келтіру жолдары және Алматы тауларындағы сел үдерістері туралы мәлімет беріледі. Бас-аяғы 130-дан астам бағдарлама, интерактивті экспозициялар ұсынылады. Бұл – теорияны тәжіибемен ұштастыратын интерактивті әрі заманауи формат.
«Біз балаға дайын жауаптар ұсынбаймыз, өзі ізденіп табатын жолды көрсетеміз, ғылымға жетелейміз. Оларға біздің ғалымдар, мамандар қолдау көрсететін болады. Тараптар баланың ұғымына сай әрекет ететіндіктен кез-келген зертханалық жұмыс қызықты болады деп ойлаймыз. Балаларға ғылымның соншалықты күрделі еместігін, оларға да қолжетімді әрі қызықты екенін көрсетеміз. Музей ішінде биотехнология, ДНҚ, физика, жасанды интеллект және басқа да салалардағы зертханалары бар Science Hub орталығы жұмыс істейтін болады. Мұнда балалар түрлі сынақ, эксперимент жүргізіп, жобаларға қатысып, әртүрлі салада қабілет-қарымын сынап көре алады. Ары қарай жолын ғылымнан табар болса, бек қуаныштымыз», – дейді болашақ Балалар музейінің білім, экспозициялар және ғылым жөніндегі директоры Дана Шаяхмет.
Елімізде адами капиталды дамытуға, ғылым мен инновацияны ілгерілетуге үлкен үлес қосуы тиіс музейдегі басты артықшылық – балалар ғылымды кітаптан емес, көзбен көріп, қолмен ұстап, тәжірибе арқылы үйренеді. Және де ілім-білімге, ғылымға құштар кішкентай достарымыз барлық процеске ата-анасымен қатыса алады.
Сегіз зертханасы болатын нысанның жалпы ауданы шамамен 27 мың шаршы метрді құрайды. Ал музейге жылына 560 мың адамнан астам адам келеді деген болжам бар.
Цифрлық даму – еліміздің экономикалық саясатының негізгі бағыттарының бірі. Балалардың ғылыми сауатын арттыру, зерттеушілік ой-қабілетін дамыту, ұштау және инновациялық білім беру ортасын қалыптастыруды көздеп отырған бұл музей осы сұранысқа толық жауап беретіні сөзсіз.
Нұржамал ӘЛІШ