Алматыда Тәуелсіздік күні қарсаңында «Ауыл» партиясы Алматы қаласы филиалы мен «Қазақ аналары – дәстүрге жол» республикалық қоғамдық бірлестігінің мүшелері «Аналар тағылымы – ел бірлігінің негізі» атты тағылымды кездесу өткізіп, ынтымақтастық туралы меморандумға қол қойды, деп хабарлайды AqshamNews.kz тілшісі.
2025 жылғы 15 желтоқсанда Тәуелсіздік күніне орай «Аналар тағылымы – ел бірлігінің негізі» атты мазмұнды кездесу өтті. Іс-шараны «Ауыл» партиясы Алматы қаласы филиалы Алматы облысы және Алматы қаласы бойынша «Қазақ аналары – дәстүрге жол» республикалық қоғамдық бірлестігінің мүшелерімен бірлесіп ұйымдастырды.
Басқосу ұлттық құндылықтарды ұлықтау, отбасылық тәрбие мен ананың қоғамдағы рөлін нығайту, сондай-ақ азаматтық бірлікті арттыру мақсатында өтті.
Кездесу барысында тараптар бірлескен әлеуметтік, мәдени және тәрбиелік жобаларды жүзеге асыру үшін өзара ынтымақтастықты дамытуға келісті. Нәтижесінде ресми түрде меморандумға қол қойылып, онда қоғамдық келісімді нығайту, ұлттық салт-дәстүрлерді кеңінен насихаттау, жас ұрпақты отансүйгіштікке тәрбиелеу және қоғамдағы әйелдер мен аналардың белсенділігін арттыру сияқты ортақ міндеттер айқындалды.
Іс-шарада «Ауыл» партиясы Алматы қаласы филиалының төрағасы Ахметбек Қоңырбаев сөз сөйлеп, Тәуелсіздіктің ел тарихындағы маңызын атап өтті. Ол ұлттық рух пен дәстүрді сақтауда аналардың және қоғамдық ұйымдардың айрықша орны бар екенін айтып, «Қазақ аналары – дәстүрге жол» бірлестігінің жұмысына жоғары баға берді әрі алдағы уақытта да бірлесе еңбек етуге дайын екенін жеткізді.
Сонымен қатар партияның 25 жылдық мерейтойына орай қоғам өміріне белсенді араласып, рухани-мәдени құндылықтарды дәріптеуге үлес қосып жүрген бірқатар азамат салтанатты түрде марапатталды. Атап айтқанда, «Қазақ аналары – дәстүрге жол» РҚБ төрайымы Дәулет Ләйле Ноғайқызы, ҚР Президенті жанындағы Мемлекеттік басқару академиясының Алматы қаласы бойынша филиалының директоры Айнұр Идрисова, «Егемен Агро» ЖШС құрылтайшысы Дамир Алимкулов және «Паритет» ЖШС қызметкері Қарлығаш Сапарбекова «Ауыл» партиясының 25 жылдық мерейтойлық медалімен марапатталды.