Өңірлік коммуникациялар қызметінің алаңында өткен брифингте Алматы қаласы жұмыспен қамту және әлеуметтік бағдарламалар басқармасының басшысы Бауыржан Жаубасов атаулы әлеуметтік көмек (АӘК) көрсету мәселелеріне тоқталып, бұл көмектің негізгі мақсаты – азаматтарға уақытша қиын жағдайдан шығуға жәрдемдесу екенін атап өтті.
«АӘК – өмір бойы берілетін жәрдемақы емес. Ол отбасыға қиын сәтте тірек болып, қайта аяққа тұруға мүмкіндік беретін қолдау түрі. Біздің басты міндет – адамдарға тек материалдық көмек емес, жұмысқа орналасуға және өзін-өзі дамытуға жол ашу», - деді Бауыржан Жаубасов.
Оның айтуынша, еңбекке қабілетті отбасы мүшелері жұмыспен қамту бағдарламаларына қатысқан жағдайда ғана көмек алу мүмкіндігіне ие болады.
АӘК екі бағытта көрсетіледі:
- Шартсыз көмек – еңбек етуге мүмкіндігі жоқ азаматтарға (I–II топтағы мүгедектер, қарттарға күтім жасайтындар және т.б.) беріледі.
- Шартты көмек – еңбекке қабілетті отбасы мүшелері жұмысқа орналасу, оқыту, қоғамдық жұмыстар сияқты белсенді шараларға қатысқанда көрсетіледі.
- 2025 жылғы 1 қазан жағдайы бойынша Алматыда 1 819 отбасы немесе 9 063 адам атаулы әлеуметтік көмек алған.
«Мұндай шаралар адамдарға тек қиындықты еңсеруге емес, өз күшіне деген сенімділікті, еңбекке деген ынтаны арттыруға көмектеседі», - деп қорытындылады спикер.