Алматыдағы 28 гвардияшы-панфиловшылар саябағында ҚР Қорғаныс министрлігіне қарасты Радиоэлектроника және байланыс әскери-инженерлік институтының 25-ші мерейтойлық түлектеріне алғашқы «лейтенант» әскери шені мен дипломдары салтанатты түрде табысталды, – деп хабарлайды aqshamnews.kz тілшісі.
Биыл аталған әскери жоғары оқу орнын 70-тен астам курсант сәтті тәмамдап, Қазақстан әскерінің офицерлер құрамын толықтырды. Олардың қатарында Ұжымдық қауіпсіздік туралы шарт ұйымына (ҰҚШҰ-ға) мүше мемлекеттер үшін әскери кадрларды даярлау бағдарламасы аясында білім алған Қырғыз Республикасының екі азаматы бар.
Салтанатты шараға Қорғаныс министрлігі мен Әуе қорғанысы күштері бас басқармасының өкілдері, Қарулы Күштерінің ардагерлері, институттың профессорлық-оқытушылық құрамы мен түлектердің туған-туыстары қатысты.
Қорғаныс министрлігі Білім және ғылым департаментінің бастығы полковник Мұрат Олжабаев жас офицерлерге ақ жол тілеп, жылы лебізін білдірді.
— Институт қабырғасында алған білімдеріңіз еліміздің әуе қауіпсіздігі мен әскери технологиялардың іргетасына айналады. Офицерлік намыс, Әскери антқа адалдық және бағыныстағы сарбаздарға қамқорлық — басты өмірлік ұстанымдарыңыз болуы тиіс, — деп атап өтті ол.
Бітірушілердің ішінде өршіл мінезімен, төзімділігімен көзге түскен түлек Баян Дәулетқазыұлының тағдыры шараға қатысушылардың жүрегін елжіретті. Осыдан төрт жыл бұрын, ол Әскери ант қабылдаған күні салтанатты жиынға асыққан оның отбасы жол апатына ұшырады. Қайғылы оқиғадан курсанттың әке-шешесі мен екі әпкесі қаза тауып, тек кішкентай інісі ғана аман қалған.
Мұндай ауыр қасіретті еңсерген Баян оқуын тастамай, міне, институтты сәтті аяқтап шықты. Өршілдігі мен оқуға деген жауапкершілігінің арқасында ол командирлері мен курстастары арасында үлкен құрметке ие.
Жас офицердің қайсарлығы мен рухының мықтылығына риза болған институт бастығы генерал-майор Нұртас Қабаков өзінің қолсағатын сыйға тартты.
— Мына сағатты өзіңе табыстағым келеді. Бұл сыйлық нағыз офицерді сыртқы қиындықтар емес, оның ішкі рухы айқындайтынын есіңе салып тұрсын. Әрдайым адал қызмет ет, тек алға ұмтыл және ешқашан берілме! — деп институт бастығы жас офицерге ақ батасын беріп, сәттілік тіледі.
Салтанатты рәсімге ерекше әсер сыйлаған сәттердің бірі – офицерлік вальс болды. Вальс аяқталғаннан кейін жас лейтенанттар сүйіктісіне үйленуге ұсыныс жасады. Жиналған жұрттың ыстық ықыласы мен зор қошеметімен бойжеткен келісімін берді.
Әскери дәстүрге сай, шара соңында түлектер институттың Жауынгерлік Туымен қоштасты. Әскери оркестрдің сүйемелдеуімен жас лейтенанттар алаңнан салтанатты шерумен жүріп өтіп, қалыптасқан үрдіс бойынша тиыннан шашу шашты.
Ширек ғасыр ішінде Радиоэлектроника және байланыс әскери-инженерлік институты 4 мыңнан астам жоғары білікті офицер кадрларын даярлап шығарды. Бүгінде олар Қазақстан Республикасының Қарулы Күштерінде, өзге де әскерлері мен әскери құрылымдарында еліміздің қорғаныс қабілеті мен әуе кеңістігінің қауіпсіздігін сенімді күзетіп келеді.