Алматыда Ахмет Жұбановтың 120 жылдығына арналған гастрольдік концерт өтеді, – деп хабарлайды aqshamnews.kz тілшісі.
Алматыда 6 сәуір күні көрнекті композитор Ахмет Жұбановтың 120 жылдығына орай «Жұбанов жаққан жұлдыздар» атты Қазақ камералық хорының гастрольдік концерті өтеді. Іс-шараның дайындығы мен маңызы туралы Өңірлік коммуникациялар қызметінде өткен брифингте айтылды.
Концерт кешкі сағат 19:00-де Жамбыл атындағы Қазақ мемлекеттік академиялық филармониясының үлкен залында өтеді. Оны Ғазиза Жұбанова атындағы Ақтөбе облыстық филармониясы ұйымдастырып отыр.
Филармония директоры, Қазақстанның еңбек сіңірген қайраткері Нұрғиса Дәуешовтің айтуынша, концерт өткізу өңірлер арасындағы мәдени ынтымақтастықты дамытып, елдің біртұтас музыкалық кеңістігін нығайту бағытында істеліп жатқан жүйелі жұмыстың бір бөлігі ғана екен.
«Бүгінгі концерт - біздің филармония мен өңірлік мәдениет мекемелері арасындағы стратегиялық әріптестіктің айқын көрінісі. Мұндай жобалар бірлескен шығармашылық бастамаларды жүзеге асыруға ғана емес, кәсіби тұрғыда тәжірибе алмасып, ұлттық музыкалық мектептің сабақтастығын қамтамасыз етуге де сеп болары сөзсіз», - дейді Нұрғиса Дәуешов.
Ғ. Жұбанова атындағы Ақтөбе облыстық филармониясының директоры Дина Ниязова да гастрольдердің ұлттық өнерді насихаттаудағы маңызын атап өтті.
«Алматылық көрерменге қазақ хор өнерінің үздік үлгілерін ұсынып, Ахмет Жұбановтың еліміздің кәсіби музыкалық мәдениетін қалыптастыруға қосқан үлесін тағы бір мәрте көрсету біз үшін үлкен мәртебе», - деп қосты ол.
Қазақ камералық хоры мен Ақтөбе филармониясы ұжымының Алматы сахнасында өнер көрсетуі ұрпақ сабақтастығы мен Ахмет Жұбанов мұрасының қазіргі академиялық музыка үшін өзекті екеніне дәлел болады.
Кеш бағдарламасында Жұбановтың хор шығармалары, сондай-ақ оның дәстүрін жалғастырған қазақстандық композиторлардың туындылары қатар орындалады. Осы жолғы концерт жоғары орындаушылық шеберлігімен, көркемдік мәнерлілігімен және айқын ұлттық нақышымен ерекшеленеді.
Хордың көркемдік жетекшісі, дирижер Мербол Құспановтың айтуынша, жоба классикалық мұраны сақтауға ғана емес, хор өнерін кең аудиторияға, әсіресе өскелең ұрпақ пен жастарға таныта түсуге де бағытталыпты.
Ұйымдастырушылардың айтуынша, бұл концерт көктемдегі маңызды мәдени оқиғаның біріне айналып, академиялық музыка мен ұлттық мәдени мұраға деген қызығушылықты арттыра түседі.