Бүгін Абай Құнанбайұлының дүниеге келгеніне 178 жыл толды. Алматыда ұлы тұлғаның атаулы күнін ресми атап өту Абай ескерткішіне гүл шоқтарын қоюмен басталды, деп хабарлайды almaty-aqshamy.kz.
Абай күніне арналған ресми іш-шаралардың бастауына бірқатар зиялы қауым өкілдері мен мәслихат депутаттары және қала тұрғындары жиналды. Олар Абай ескерткішінің алдына ұлы тұлғаның рухына тағзым етіп, гүл шоқтарын қойды.
Қазақстан Жазушылар одағының төрағасы Мереке Құлкенов бастап мерекелік құттықтау сөзін сөйледі. Қаламгерлер атынан сөз алған М.Құлкенов: «Мынау, ұлы тұлғаға арналған көркем туынды Абайдың 115 жылдығында қойылған еді. Осымен бірге Алматыға Абайдың рухы келіп қонды. Биыл бұған 63 жыл толған екен. Абай өзі Жидебайда тұғанымен әр қазақ өз жерінде, Маңғыстауда, Талдықорғанда, Көкшетауда «Абай біздің ақынымыз» деп мақтан тұтады. Туған күнін дүбірлетіп тойлайды. Ол өз заманында алғаш рет халықты толғандырған қоғамдық және саяси өмірдің проблемаларын қозғады. Қоғамның қайшылығымен бірге замандастарының берекесіздігін, отарлық саясаттың зиянын сынай отырып, халыққа іш тартты. Елін озық мәдениетке қарай жетеледі», – деді.
Абай күніне орай ресми іс-шаралардың жайын сұрағанымызда Алматы қаласы Мәдениет басқармасының басшысы Ғани Майлыбаев былай деді: «Өздеріңіз білетіндей, айтулы мерекені Алматы жұртшылығы, жыл сайынғы дәстүріне сай, ескерткішке гүл шоғын қоюдан бастап жатыр. Оған зиялы қауым өкілдері, қалалық мәслихаттың депутаттары, мәдениет және қоғам қайтарткерлері де қатысуда. Айта кетері, ескерткішке гүл шоғын қоюмен басталған мереке орталық қалалық кітапханадағы үлкен дөгелек үстелге, одан кейін «Алатау» дәстүрлі өнер театрындағы мерекелік концертке ұласады», – деді.
Сонымен бірге, Ғани Майлыбаев Абай шығармаларына, рухани мұраларына арналған концерттік шараның қала тұрғындары үшін тегін екенін де ескертті.
Қазақтың ұлы тұлғасы, ұлтымыздың адамзат рухани қазынасына қосқан үлесі саналатын Абай Құнанбаевтың туған күні 2020 жылы 5 тамызда ресми мерекелік күн ретінде бекітілген болатын. Содан бері бұл күн республикамыздың жер-жерінде аталып өтілуде.
